Nyimbu 94 - La Sainte Bible en Langue Yipunu

DUIMBU Nsambi mugabusilitsi upila

¹ Aa Fumu, Nsambi mugabusilitsi upila! Nde aguvu mugabusilitsi upila, kelasa!

² Ndeʼ aguvu nsonsi jibisi bulongu, kilisa bango dunangu nana divu diwelimina nogu!

³ Aa Fumu, te na temu yi te na temu yi batu babi bosangilanga?

⁴ Te na temu yi bovosilanga bilombi bikulini? Botsu abevayingi mabi bokekakisanga?

⁵ Aa Fumu, utsoyisa betsoyisi batu bagu, ubunga bebungi disiala diagu.

⁶ Uboka beboki bakuili na benyi, uvuna bevuni bisiana.

⁷ Mbana bevosi rie: Fumu agelabi Nsambi Jacob agekipi!

⁸ Jenu biduka, kebananu! Temu yi dubila na diela?

⁹ Jandi agumasunda matuji, agegulu? Jandi agumasunda misu, agelabi?

¹⁰ Jandi oyisiembi bisi malongu, agobakilisa? Jandi oyilonsi batu ogambu na diela?

¹¹ Fumu ejabi matasa mamutu, ejabi yiri mavu kulini.

¹² Aa Fumu, ka muna ubueji gu uvu na mutu agu guisiembi agu guilonsi migaga miagu!

¹³ Orungula uba sui mu bilumbu bimaguga te na bavinitsi bandi bobetsu.

¹⁴ Fumu agebusi batu bandi, nyiina, agebusi abandi.

¹⁵ Bomuetabula bunsonsi busungama na batu basungama bobusinga.

¹⁶ Anyi okwamusa na batu babi? Anyi okwaka kalala na bavayitsi bamabi?

¹⁷ Mbe Fumu agaa muwamusi ami mbe nyimasundila ufu.

¹⁸ Ava nyivosilingi rie: Uberuga nyiberuyi, ndeʼ Fumu guikwarisi na maboti magu.

¹⁹ Ava murima ami uvu ubasa de na matasa makulini, mbembugulu tsiagu tsipeyi nsangu.

²⁰ Gurungula uba na yimbatsi na bansonsi babi? Tsiri jogu abetsoyisi batu na migaga miogu?

²¹ Betumuni batu basungama va julu vana beveyi mbela ombu abagaa na diambu.

²² Tumba Fumu amaba divumunu diami dineni, Nsambi ami avu dimanyi diami adi nyisueminingi.

²³ Agobakilisa mu diambu dimabi mogu? Agobabunga mu diambu dinsimbulu tsiogu? Nyiina, Fumu Nsambi etu obabunga.