Nyimbu 92 - La Sainte Bible en Langue Yipunu

DUIMBU Nana divu diwelimina uyitsa Fumu

¹ Duimbu duyilumbu yiuvuma.

² Divu diwelimina uyitsa Fumu, divu diwelimina usangila Nsambi Aguvu Uneni

³ nosamuna maboti magu kedi nesi usigama uagu va mukolu.

⁴ Na yisigu na yigumi yimikudu na ngomfi na diufi disambi.

⁵ Aa Fumu, bisalu biagu bindasi nsangu! La dibandu nyisangili bisalu biagu.

⁶ Aa Fumu, ka muna bisalu bineni gumasala! Matasa magu mavu tindi madonga.

⁷ Yiduka agejabingi diambu, nyiina, agedikipingi.

⁸ Diuleba batu babi beneyi nana biriri na bavayitsi bamabi befuningi disukusulu diogu diuba dubungu dumutubu.

⁹ Ndeʼ guvu Fumu Nsambi Aguvu Uneni mutubu na mutubu.

¹⁰ Aa Fumu, labati bavinitsi bagu! Bavinitsi bagu ubungana bebungini; botsu abevayingi mabi bopansiga.

¹¹ Gumapega mangolu mapasa; gumambiatsa na matsi magona.

¹² Nyilabi ubetsu ubavinitsi bami nyigulu migamu mibatu babi ne mi-abepini.

¹³ Batu basigama bavu nderi musoyi mbari, beneyi nderi musedera uLiban.

¹⁴ Bavu nderi miri amimavaru o Ndagu Fumu amiburingi milunda o ndombili tsiNdagu Nsambi etu.

¹⁵ Miburingi nesi va bununu, mivu na maka mapuela na magaji magona,

¹⁶ amina mijabisi usungama uFumu, yiri agaa na mabeʼ mabeji, avu Dimanyi diami.