Nyimbu 91 - La Sainte Bible en Langue Yipunu

DUIMBU Yidumbitsi yiNsambi Aguvu Uneni

¹ Jandi oyiketsanisa o tsi yidumbitsi yiNsambi Aguvu Uneni eketsanisa o tsi yidumbitsi yiMungo Mangolu motsu.

² Ana musuga utsingula Fumu rie: Ndeʼ guvu yisuemunu yiami na yivaga yiami, ndeʼ guvu Nsambi ami, nyiguvayili yitu.

³ Fumu oguwaka kalala mu murambu agu begurambili, nesi yivunga ayigudisi.

⁴ Ogukubiga mapapi mandi, gudila yisuemunu o tsi mapapi mandi. Usigama uandi uvu ngubu.

⁵ Gugoduma diambu; nesi goma tsimukolu nesi bidunga binyangu

⁶ nesi yivunga ayivioyi o tsi pisama nesi dufu dukangala kangala.

⁷ Diuleba tosini tsibatu bobemga va mugula agu nesi yigumi yitosini boberuga va mbaala magu ne nana gugobembu.

⁸ Tiemuna, gulaba nana Fumu ekilisili batu babi.

⁹ Mu mbari gumavaga Fumu yisuemunu yiagu na Nsambi Aguvu Uneni divumunu diagu,

¹⁰ gugolaba ne purulu jimosi ne yidungu yimosi yigobemba ndagu agu.

¹¹ Nsambi oruma biansa biandi ugukelisa mu mansila magu motsu.

¹² Bogukelisanga yiri gugoduku ne dibaku.

¹³ Gurungula utsiarila yimbungu nesi nyoga, muana yimbungu na mukuimbu nyoga.

¹⁴ Fumu evosi rie: Etondi, kabogu nyumuwaka kalala; nyumukelisanga mu mbari enjabi.

¹⁵ Ondengila na nyumuwagula; nyubanganga nandi ava olabilanga munyongu. Nyumuwaka kalala, nyumugabusa digoba diandi.

¹⁶ Nyumubuesa bilima na nyumulasa dugobutsu duami.