Nyimbu 9 - La Sainte Bible en Langue Yipunu

DUIMBU Fumu Mugobutsi ubijaga nesi abamakambulu

¹ Duimbu duyivunda yibawimbitsi na duDavid adumawimbulu na yima ayinengulu aigu.

² Fumu na murima ami uotsu nyutubula maboti magu motsu.

³ Nsambi Mungo Mangolu Motsu nyuwimbilanga temu tsiotsu nyudumisa diina diagu!

⁴ Batu abepini begabuyi mansinsima bededi na begungini va gusu agu.

⁵ Nyiina, ndeʼ gumawarisa musuga ami nesi kingu ami ndeʼ guitsani va yitsiga yiagu utabula bunsonsi.

⁶ Guikilisi bisi malongu guibungi mutu mubi guitsinduli miina mogu mutubu.

⁷ Muvinitsi ami amatsiemuga amatsiemuga mutubu; gumagudisa bisi misiengi miandi, birangumunu bimionyi bisatsi.

⁸ Fumu erumingi te na mutubu; amakerungisila yitsiga yibufumu ayi etsanini utabulilanga bunsonsi.

⁹ Erumi bulongu na dusungugu etabulili bisi bulongu bunsonsi buwelimina.

¹⁰ Fumu avu yisuemunu yi-abamakambusu, nyiina, yisuemunu va temu munyongu ogu.

¹¹ Jogu abegugengila bekeveyi ombu gagu. Aa Fumu, ndeʼ gugebusi aberuyi ombu gagu!

¹² Wimbilanu nyimbu tsiFumu oyitsani va yitsiga yibufumu o Sion. Samunanu misamu mibisalu biandi ombu batu botsu.

¹³ Jandi egabusili pila jimalungu eranginini monyi, agelibini mitatu mibijaga abemugamuyili.

¹⁴ Fumu ndasi yingeba! Labati nana nyilabili maguga ama batu abepini bendasi, ndeʼ aguikusulili dufu.

¹⁵ Kabogu nyusamuninanga duyitsu duagu duotsu o musiengi uSion nyusangila mu mbari guvu Mugobutsi ami.

¹⁶ Bisi malongu bamabonduga mu biduna abi bamatima; bamawakululu mu mirambu ami jogu beni bamaramba.

¹⁷ Fumu amakejabisa amalasa dusungugu duandi; mutu mubi amawakululu mu murambu ujaʼ beni. Letasatianu

¹⁸ Batu babi uwenda bewendi o mbura jiabafu, nesi bisi malongu botsu abelibini Nsambi.

¹⁹ Nsambi agolibana agumakambulu mutubu, bijaga bigoba bijaga mutubu.

²⁰ Kokolu tsiagu Fumu, mutu ayalasa mangolu mandi! Bisi malongu batabululu bunsonsi va gusu agu!

²¹ Aa Fumu, balasi goma! Bisi malongu bajabi yiri bavu yika batu. Letasatianu