Nyimbu 88 - La Sainte Bible en Langue Yipunu

DUIMBU Yika ufu nyifu

¹ Duimbu dubaCore na duyivunda yibawimbitsi adumawimbulu na dimbika. Duimbu adumatubu na Heman muisi Ezra.

² Aa Fumu Nsambi, Mugobutsi ami! Nyangu nyigamuyi, kwamusi; mukolu nyivu va gusu agu.

³ Dusambu duami dugulunu nagu! Liga matuji ugulu mitatu miami!

⁴ Nyimatopulu maguga yika ufu nyifu.

⁵ Botsu bekengili nderi nyisaa na tsongu, nyisaa na mangolu.

⁶ Nyimasilugu va gari bamfumbi, nyimabegunu na jogu abamaboku nosilugu mu bangila. Ndeʼ gugemuebarangimiila, gugemuebakipanga.

⁷ Gumambuaga o ngila jidonga, aguvu yika pisama na pisama.

⁸ Kabu agu jimapiolila, nyivu nderi mutu agumakambusu na mbiji. Letasatianu.

⁹ Gumakakasana bambatsi bami nami, gumapaga nsoruru va gusu ogu. Nyimabamugu na purulu, ngomuerungula upala.

¹⁰ Misu mami yika tsasa. Aa Fumu, nyigutatili bilumbu biotsu, nyisambi makaka ombu gagu.

¹¹ Je ndeʼ guivayili abamafu bimaga biagu? Abamafu besimbuyingi uguyitsa? Letasatianu.

¹² Bekakisi maboti magu o ngila: bekakisi usigama uagu o mbengi?

¹³ Bimaga biagu bijabunu o pisama? Je duwamusu duagu duilibunu?

¹⁴ Aa Fumu, nyigutatili, ubanda kedi nyigusambili rie:

¹⁵ Aa Fumu, dibandu yi guindiyili nsima? Dibandu yi gumansuemina?

¹⁶ Ubanda va bungebi buami, nyimakambulu na nyitsoyingi, yika ufu nyifu, goma agu jimapiolila, nyina murima o julu.

¹⁷ Kabu tsiagu tsindiamisi nderi mibiji te na tsimbungi.

¹⁸ Tsipevuli bilumbu biotsu nderi mijamba amindiamisi wandi.

¹⁹ Gumakakasana bambatsi bami botsu nami. Ngaa na mbatsi jisusu yikapisama.