Nyimbu 86 - La Sainte Bible en Langue Yipunu

DUIMBU Ava nyivu na munyongu nyigutatili

¹ Duimbu duDavid. Fumu liga matuji nokulu! Kwaguli, nyimakambulu na yijaga nyivu.

² Nyivu mu dutalu dujogu abegurondi, nsueyi. Aa Nsambi ami, kobuli menu anyikevega ombu gagu.

³ Bilumbu biotsu nyigutatilingi, Aa Fumu, ndasi yingeba!

⁴ Ndasi ubueji, Fumu nyiguveyi murima ami.

⁵ Aa Fumu, ndeʼ guvu muboti na guitandingi, guilasingi maboti ombu jogu abegutatili.

⁶ Aa Fumu, liga matuji ugulu dusambu duami, ba limba ugulu ndembu tsiami!

⁷ Mu yilumbu yimunyongu ami nyigutatili mu mbari guikulungu.

⁸ Fumu, vagaa nsambi ne jimosi ajivu dedi nagu, vagaa yisalu ne yimosi ayibagunu na bisalu biagu.

⁹ Bisi malongu motsu aba ndeʼ gumasunda boyigudamanga va gusu agu noguyitsanga.

¹⁰ Ndeʼ guvu muneni na guivayingi bimaga, bundeʼ aguvu Nsambi.

¹¹ Aa Fumu ndonsi mansila magu! Nyugudedila na nyuba usigama; ndonsi ugusalila na murima ami uotsu!

¹² Aa Fumu Nsambi ami nyuguyitsanga na murima ami uotsu! Nyugudodisanga te na mutubu.

¹³ Ndeʼ guimfunisilingi maboti magu, gumakwaka kalala o mbura jiabafu.

¹⁴ Aa Nsambi, bango dunangu berondi untoyisa, yinombu yibango dikasi berondi umboka. Bagegutasili via!

¹⁵ Tumba ndeʼ Fumu guvu Nsambi aguvu na yingeba na maboti agugaa na yifutsu, aguvu abasa na durondu, aguvu asigama,

¹⁶ Kengili na ndasi yingeba. Nyivu musalitsi agu, peyi mangolu magu; nyivu aguagu, kobuli.

¹⁷ Aa Fumu ndasi yilimba! Bavinitsi bayilabi; balabi yisonyi! Ndeʼ Fumu, guikwamusi na guimbembiyi.