Nyimbu 85 - La Sainte Bible en Langue YipunuDUIMBU Fumu utubula etubuli duvotsu 1 Duimbu duyivunda yibawimbitsi na dubaCore. 2 Aa Fumu, ndeʼ gumalasa bulongu buagu ubueji! 3 Gumagobula bategula baJacob. Gumatandila batu bagu mabi mogu, gumakubiga masumu mogu motsu. Letasatianu. 4 Gumagusula kabu jiotsu, gumabusa umuetunyoyila. 5 Aa Nsambi Mugobutsi etu tureliyi, guyamuetuvinanga! 6 Gutunyoyila mutubu? kabu agu jiutsinganga mutubu? 7 Gugotugabusa mangolu, jetu batu bagu tugomuegusangila? 8 Aa Fumu, tulasi maboti magu, tusingisi duwamusu duagu! 9 Nyigulu adi Fumu Nsambi evosi; Fumu utubula etubuli duvotsu ombu batu bandi nesi basigama bandi; ombu abemuvayili yitu. 10 Nyiina, avu akunsama ugobula jogu abemuyitsi yiri bundumba buandi bulabana o bulongu buetu. 11 Maboti na usigama bifubini, dusungugu na duvotsu wandi. 12 Usigama ubatu uilabini va tsi, dusungugu duNsambi duiruyili o julu. 13 Fumu jaʼ beni ovega maboti, bulongu buetu butubendisila bivaru. 14 Dusungugu durela va gusu Fumu, dumusolila nsila aji ovioyila. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon