Nyimbu 81 - La Sainte Bible en Langue YipunuDUIMBU Mbe batu bami bekulu 1 Duimbu duyivunda yibawimbitsi na duAssaf adumawimbulu na sambi jiGat. 2 Wimbilanu na nsangu uyitsa Nsambi aguvu yisuemunu yietu, gamuyianu Nsambi Jacob migamu minsangu! 3 Tubanu nyimbu, siganu bandungu nesi basambi na bangomfi! 4 Siganu mumbanda ava duilabili yisusungi nesi ava tsungi jidugulu, mu yilumbu yifeta etu. 5 Aguna uvu mugaga ubaIsrael na diruma diNsambi Jacob. 6 Aguna uvu mugaga agu amaruma Joseph ava amakilisila bisi Egypte. Mbana nyimagulu diufi adi ngejabi rie: 7 Nyimagusula mufuna va disambaka diagu; makaka magu mamapatusa mufuna. 8 Ava gumalabila munyongu nyimaguwaka kalala. Nyimaguwagula va gari mungudi. Nyimaguweliga va mamba maMeriba Letasatianu 9 Jenu batu bami guluanu, lubuganu! Jenu baIsrael mbe dukulu! 10 Vayamueba bansambi bangana va gari enu! Vayamueba muyitsa ubansambi bangana! 11 Menu la Fumu Nsambi enu agumadupalisa o bulongu buEgypte, kwivulianu ama duvu na nsala na nyuduvega monyi. 12 Tumba batu bami basamagulu diufi diami, Israel basamadedila. 13 Kabogu nyimabaliyila nsima mu mbari bamagalisa mirima miogu; bamaduka matasa majogu beni! 14 Aa mbe batu bami bekulu, mbe baIsrael bamakipa amami. 15 Mbe nyibelisa batu abebavini namapapa; mbe nyulasa bavinitsi bogu mangolu mami! 16 Jogu abevini Fumu boyenadunsanga batu bandi maboti maIsrael matsingingi mutubu! 17 Fumu odubungulanga na biguji na ble na odugukurusu buji. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon