Nyimbu 80 - La Sainte Bible en Langue Yipunu

DUIMBU Mubungulitsi ubaIsrael, liga matuji

¹ Duimbu duyivunda yibawimbitsi na duAssaf adumawimbulu na bitara.

² Mubungulitsi ubaIsrael liga matuji, ndeʼ aguiwendisi batu bagu nana guiwendisili mugamba! Vedimisa bundumba buagu ndeʼ aguitsani va yitsiga yiagu yibufumu ayivu va julu bibagunu bibi ansa!

³ Lasa mangolu magu ombu baEfraim na baBenjamin na baManasse, ruga yituwamusa!

⁴ Aa Nsambi, tureliyi! Tulasi yijalala yiagu mbana tugobulu!

⁵ Aa Fumu Nsambi mabadi! Te na temu yi gunyoyila dusambu dubatu bagu?

⁶ Yiguji ayi guibaveyingi yivu matsanga, guibanuisingi yika matsanga wandi.

⁷ Guisingisi abamabambana netu utusienganga na bavinitsi betu betudesingi.

⁸ Aa Nsambi mabadi, tureliyi; tulasi yijalalayiagu mbana tugobulu!

⁹ Ndeʼ gumarubula mfuga jirayisan o Egypte; gumabinga bisi malongu yiri gujivara guna!

¹⁰ Gunobala mbura, jimafunisa ngansi te na jimakubiga dilongu diotsu;

¹¹ mikongu mimaba o tsi yidumbitsi yijionyi na bitayi bijionyi bimaba nderi misedera amineni.

¹² Bitayi bimfuga eni bimawala te no mubu na mimbendila mijionyi te no mujamba uneni.

¹³ Dibandu yi gumapansa bivaga bijionyi? Balinsi badayingi milunda mijionyi.

¹⁴ Banguji bemijangingi na bibulu bisusu wandi.

¹⁵ Aa Nsambi mabadi, lerugati, ndeʼ aguvu ojulu, letasati mfuga eni!

¹⁶ Kelisa aji ndeʼ beni gumavara muana dibaala agu gumakesolila!

¹⁷ Jimanyensu na muji na jimapansu! Botsu abamajibivisa babungini na kabu agu.

¹⁸ Kelisamutu agu gumatsanisa va mabaala magu nesi agu gumabangusa.

¹⁹ Mbana tugomuegabuga mansinsima; tuveyi monyu na tuguyitsanga.

²⁰ Aa Fumu Nsambi mabadi, tureliyi; tulasi yijalala yiagu mbana tugobulu.