Nyimbu 79 - La Sainte Bible en Langue Yipunu

DUIMBU Ruga yituwaka kalala, ukambulu tuikambuli

¹ Duimbu duAssaf. Aa Nsambi, bisi malongu bamabasa dilongu adivu disiala diagu, bamasabula Ndagu agu, bamakalusa Jerusalem yika diguki dimamanyi.

² Bamavega bamfumbi babasalitsi bagu ombu batsoli, bamavega bamfumbi babasigama ombu bibulu bibukanyi.

³ Bamawitila malungu mogu yiari na yiari biJerusalem na vasamaba ne mutu ubatsiga.

⁴ Tumasiengungu na bambatsi betu, tumadesungu norekugu na jogu abavu yiari na yiari.

⁵ Aa Fumu, te na temu yi gunyoyilanga? Je kabu agu jiulavanga nderi muji?

⁶ Lasa kabu agu ombu bisi malongu abagegujabi; jilasi o bufumu bueni abugeyitsi diina diagu!

⁷ Bamakinda baIsrael na bamapansa mbura tsiogu.

⁸ Guyamuerangimina mabi ma-abamaturela. Kokolu tsiagu, lensa notulasa yingeba mu mbari tumakambulu tindi ukambulu.

⁹ Aa Nsambi, ndeʼ aguvu Mugobutsi etu tuwamusi yiri diina diagu diudodusu! Tuwaki kalala na tutandi masumu metu mu diambu didiina diagu.

¹⁰ Dibandu yi bisi malongu bowivulila rie: Nsambi ogu aka? Bajabi va misu metu yiri ndeʼ guigabusili pila jimalungu mabasalitsi bagu!

¹¹ Bibimu bibaviga bigulunu te nombu gagu! Ndeʼ aguvu na mangolu maneni, waka abebungini kalala!

¹² Aa Fumu, batu abebambini netu bamagutumuna mu diambu dibisiengu bagabusili pila yisambuali yikumbu.

¹³ Tumba jetu batu bagu tuvu bindombu abi ndeʼ guibunguli, tuguyitsanga mutubu; tusamunanga duyitsu duagu te na kula tsiotsu.