Nyimbu 78 - La Sainte Bible en Langue Yipunu

DUIMBU Mambu mabaIsrael mayalibunu

¹ Duimbu duAssaf. Batu bami guluanu malongi mami, liganu matuji ugulu ama nyivosi!

² Nyuduvosulila mambu; nyuvosa bimaga abimalabana kala.

³ Adi tumagulu adina tuijabi, adina bataji betu bamatutsingula.

⁴ Tugodisueyila baana betu; tudilonsanga aboburungu, diuba dibandu diduyitsu duogu; borangiminanga mangolu mandi na bimaga abi amavaganga.

⁵ Amavega baIsrael migaga amavega bategula baJacob maruma. Merumi batji betu umalonsanga baana bogu.

⁶ Mojabunu na dukula aduruganga nesi baana bogu aboburungu, jogu wogu bomalonsa baana bogu

⁷ yiri bovayila Nsambi yitu na bagolibana bisalu biandi na bokelisanga maruma mandi.

⁸ Mbana bagogukulila bataji bogu abamaba batsoritsi na mimbini, abamaba na penda, abasamaba basigama va gusu Nsambi.

⁹ BaEfraim, diuleba bamaba na mbansa na pita, bamarina yilumbu yidivita.

¹⁰ Basamakelisa pangini jiNsambi; bamabusa ukipanga migaga miandi.

¹¹ Bamalibana bisalu biandi na maboti ama amabalasanga.

¹² Va gusu bataji bogu amabavayilanga bimaga o bulongu buEgypte o yiari yiSoan;

¹³ Amapasa mubu na amabavayila diviogulu, amareliga mamba nderi yibaga.

¹⁴ Nyangu amabawendisanga na dimungi, mukolu amabawendisanga na muji uneni.

¹⁵ Amapasa mamanyi o kumu amabavega mamba monu mapuela mapuela.

¹⁶ Mu dimanyi amapalisila mamba amamavuvanga amamabasa nderi mijamba.

¹⁷ Ne nana bamamuevaganga masumu bamabusila Nsambi Aguvu Uneni o kumu.

¹⁸ Bamamanga Nsambi ava bamavondila biguji abi bamagulu nsala.

¹⁹ Bamavosila Nsambi kulini nowivula rie: Nsambi orungula utukunsila tavula o kumu?

²⁰ Dingensa amadimba dimanyi, mamba mamapala, mijamba migeyi mimabasa. Je orungula uvega batu bandi biguji na banyama wandi?

²¹ Fumu anogulu mitatu mieni amabasa na kabu; amajinyoyila baJacob na amajinyoyila batu bandi.

²² Basamavayila Nsambi yitu; basamavayila nesi duwamusu duandi yitu.

²³ Amaruma mamungi majulu najulu jimadibula

²⁴ amababondusila biguji bijulu abimanengulungu manna.

²⁵ Jogu botsu bamaji biguji bibiansa; amabatindila biguji bibiansa; amabatindila biguji abimabagukurusu.

²⁶ Punga jiyiari ayi wisi epalili jimagumba, mangolu majionyi mamaduta punga jitandu;

²⁷ amababondusila banyama abamabanderi difufundu na batsoli abamaba nderi yisieyi yimubu.

²⁸ Amababondusila va gari milaku ogu nesi yiari na yiari bimbura aji bamatsaninanga.

²⁹ Bamaji na bamagukuru te na bamatopulu, Nsambi amabavega biguji abi bamagulu nsala.

³⁰ Mbe biguji biki o miunu miogu na mbe basakagukuru ne ugukuru,

³¹ Nsambi amabanyoyila kabu, amabokisa bamosi abamaba na mangolu na amabokisa bafudu baIsrael.

³² Ne nana bamamuevaganga masumu basamavayila bimaga biandi yitu.

³³ Bilumbu biogu bimasundila uvioga yika nana; bilima biogu bimasundila utsiemuga.

³⁴ Anobokisa bamosi, basusu bamamuromba bamagabusa mirima nsima, bamageluga ombu Nsambi.

³⁵ Mbana bamarangimina yiri Nsambi avu dimanyi diogu yiri Nsambi Aguvu Uneni avu Mugobutsi ogu.

³⁶ Tumba bamamulasa penda tsiogu yika ufura bamafuranga

³⁷ basamakevega ombu gandi bamabunsa pangini andi.

³⁸ Tumba mu diambu durondu duandi amabatandila mabi na asamababunga; kumbu tsipuela amakekelisa yiri agonyoga na amasikiga kabu andi.

³⁹ Asamalibana bumutu buogu: punga jivioyi na jigemuegabuga.

⁴⁰ Kumbu tsipuela ava bamabila o kumu bamamubusa, kumbu tsipuela bamunyoyisa.

⁴¹ Basamadunda umanga Nsambi, bamatumunanga Nsambi Israel.

⁴² Basamarangimina mangolu mandi mayilumbu ayi amabawaka kalala ombu bavinitsi

⁴³ nesi bimaga abi amavaga o Egypte nesi abi amavaga o Soan:

⁴⁴ amakalusa mijamba miogu yika malungu te na basamamuerungula unu mamba.

⁴⁵ Amabatindila biragala abimabakutanga na milansa amimababunga.

⁴⁶ Amawakisa digumba diogu ombu makokoku amamabunga biotsu.

⁴⁷ Amabunga mfuga tsirayisan na mfula jimamanyi, nesi miri miogu misikomora mimabungu.

⁴⁸ Amabokisa biruitsi biogu na mfula jimamanyi, amabondusila migamba miogu muji o julu.

⁴⁹ Amalasa bisi Egypte kabu andi nyiina, tindi kabu andi, amasindiga dibadi dibiansa bidubungu.

⁵⁰ Amanyoga nana amarondila, asamababokisa buandi tumba amabatsoyisa na bivunga wandi.

⁵¹ Amabokisa tsomi tsiotsu o Egypte tsomi tsibategula baCham tsomi tsiotsu tsibabaala, tsomi tsiotsu tsimangolu mogu.

⁵² Amawendisa batu bandi nderi bindombu, amabawendisa nderi mugambu ubindombu o kumu.

⁵³ Amawendisa baIsrael, amabakelisa mu bidungu biotsu; mubu umadiamisa bavinitsi bogu.

⁵⁴ Amabatolisa te no bulongu buandi o yiari yimukongu agu amabadilila na mangolu mandi.

⁵⁵ Amababingila bisi malongu; amabagabila bulongu na mbanda; amatsanisa bifumba biIsrael ombu bisi Canaan.

⁵⁶ Tumba baIsrael bamamanga Nsambi Aguvu Uneni bamamubusa na basamakelisa maruma mandi.

⁵⁷ Bamakakana nandi, bamaba mimbini dedi mosi na bataji bogu, bamaba nderi mbansa atsimatindu na pita jibiva.

⁵⁸ Bamanyoyisa Fumu na mbura tsiogu tsiduyitsu bamasibisa diwavi diandi na bakosi bogu.

⁵⁹ Adina Nsambi amanyoyila la dibandu amabusila baIsrael tindi ubusa.

⁶⁰ Amabusa Ndagu Yibenguna o Silo, mbura aji amatsaninanga va gari ogu.

⁶¹ Mbe ka yigara yipangini ayimaba yilimba yimangolu mandi nesi bundumba buandi amayesingisa upatulu na bavinitsi, yimabegu o bulongu bungana.

⁶² Amasingisa batu bandi ubokusu, amanyoyila abandi.

⁶³ Muji umasielasana bafudu bandi, batsiemi bandi basamamueyitsu.

⁶⁴ Bavagulitsi bandi bapagu bamaboku na majenga, bakuili bogu basamamuelila.

⁶⁵ Mbana Fumu amarambuga nderi mutu agubetsi yilu, nderi ngogaga ajimajunsu malamu.

⁶⁶ Amadimbisa bavinitsi bandi abamarina amabalasanga yisonyi.

⁶⁷ Amabusa bategula baJoseph; amasola yifumba yiEfraim;

⁶⁸ amasola yifumba yiJuda nesi mukongu uSion agu amarondanga.

⁶⁹ Amayerungisa Mbura andi nana amarungila mbura andi o julu; amajiwarisa nana amawarisila butamba abuvu buwara mutubu.

⁷⁰ Amasola musalitsi andi David agumaba mubungulitsi ubindombu.

⁷¹ Amayemubonga ava amakelisanga bindombu, amamuvaga mubungulitsi ubaIsrael abavu tindi batu bandi.

⁷² David amaba mubungulitsi ogu amabanganga na murima usunda; amawendisanga batu baFumu na diela.