Nyimbu 77 - La Sainte Bible en Langue Yipunu

DUIMBU Ava nyivu na munyongu nyirondi umuelaba bimaga bikala

¹ Duimbu duyivunda yibawimbitsi na duYedoutoun na duAssaf.

² Diufi diami dimati ombu Nsambi ava nyigamuyili; diufi diami dimati ombu Nsambi yiri okulu.

³ Ava nyivu na munyongu nyigeluyi, nyirombi Fumu. Mukolu nyisambingi miogu miami tsiri umisundusa; murima ami uibusi mbembugulu tsiotsu.

⁴ Nyirangimini Nsambi na nyitsukimi; nyinomutasa murima ami umalenga. Letasatianu

⁵ Ndeʼ guipeyi dukanda ava nyivu na murima o julu ngerunguli ne uvosa.

⁶ Nyirangimini temu tsikala na nyirangimini bilima abimavioga.

⁷ Mukolu nyirangimini nyimbu tsiami, nyiguyitsi na murima ami te na nyikewivula rie:

⁸ Fumu otuliyila nsima mutubu? Agomuetugengila?

⁹ Maboti mandi mamasuka mutubu? Asaa na diambu ututsingula?

¹⁰ Nsambi amalibana utulasa yingeba? kabu andi jimamurombisa ugalisa murima? Letasatianu

¹¹ Mbana nyimavosa rie: Adindasi buali adidi rie: Nsambi Aguvu Uneni agemuetulasa mangolu nana na kala.

¹² Aa Fumu, nyimuetasa bisalu biagu, nyiina, nyirangimini maboti magu makala.

¹³ Nyitasingi bisalu biagu biotsu, ka muna urangimina gu nyirangimingi!

¹⁴ Aa Nsambi, motsu ama guivayingi mavu mawelimina! Va nsambi aguvu dedi nagu?

¹⁵ Ndeʼ guvu Nsambi aguivayingi bimaga; gumalasa batu mangolu magu.

¹⁶ Na dikaka diagu gumagobula batu bagu, bategula baJacob na baJoseph. Letasatianu

¹⁷ Aa Nsambi, mamba mamagulaba! Mamba manogulaba mamaregama; nesi ndonga tsimakungusu.

¹⁸ Mamungi mamanoyisa mfula jineni, yidumi yimagulunu o mamungi, tsiemu tsiagu tsimavedama yiari na yiari.

¹⁹ Yidumi yiagu yimadumanga, tsiemu tsimamonitsa bulongu butamba abumaleba sui bumaregamanga.

²⁰ Gumavaga nsila agu o mubu, gumajiviosa mu mamba, mutu agorungula ulaba dibondu diagu.

²¹ Gumawendisa batu bagu nana mubungulitsi; gumabawakisa ombu Moise na Aaron.