Nyimbu 76 - La Sainte Bible en Langue Yipunu

DUIMBU Nsambi amalunga o Sion

¹ Duimbu duyivunda yibawimbitsi na duAssaf adumawimbulu na bisigu abivu na mikudu.

² Nsambi ejabunu o Juda, diina diandi divu na diduma o Israel.

³ Ndagu andi jivu o Salem, mbura andi jivu o Sion.

⁴ Avana amapansila bitogulu bidivita: mbansa na ngubu na dijenga. Letasatianu

⁵ Ndeʼ guvu na tindi bundumba, nyiina, muneni uviolila mikongu mineni.

⁶ Bangogaga beni abavu na tindi mangolu, bamakindu, bamaboku o julu mukongu; bagora beni bamatsiemusa mangolu mogu.

⁷ Aa Nsambi Jacob! Na nsiembu tsiagu babeyitsi babakabala na bakabala bamaboku.

⁸ Aa ndeʼ guvu tindi muneni! Anyi orungula ugagana nagu ava kabu agu jirangili?

⁹ O tindi julu gumatabulila bunsonsi; butamba bumaregama na bumaba sui.

¹⁰ Nsambi, gunoretsama utabula bunsonsi, avana gumagobulila botsu abamakambulu va butamba. Letasatianu

¹¹ Nesi kabu jimutu jiurungula ukaluga duyitsu duagu, aborina kabu agu boguvayila feta.

¹² Vangananu pangini na Fumu Nsambi enu tsidugusuanu wandi! Jenu botsu aduvu mu dibuli diandi ruganu uyevagulila Nsambi aguvu muneni pagu.

¹³ Nsambi ediamisi dunangu dubaana bakaga nesi bakaga bemudumingi.