Nyimbu 74 - La Sainte Bible en Langue Yipunu

DUIMBU Usambila besambili va gusu Ndagu Nsambi ajimapansiga

¹ Duimbu duAssaf. Aa Nsambi, dibandu yi gumatuliyila nsima mutubu? Dibandu yi gunyoyila batu bagu mutubu, mugambu agu guibungulingi?

² Rangimina batu bagu aba gumadila kala aba gumakobula uba mu yifumba ayivu disiala diagu! Rangimina mukongu uSion agu gumatsaninanga.

³ Vioga noyelaba mbura tsieni atsipansugu; muvinitsi amapansa biotsu o Mbura Nsambi.

⁴ Bavinitsi bagu bamagumba o gari Ndagu agu; bamayenareliga bilimba biogu.

⁵ Bamakelaba nderi bariabitsi abewangi o dijombi.

⁶ Mua pesu temu bamapansa biotsu na mumbi na bamarto.

⁷ Mbana bamanyensa Mbura Nsambi; bamaberusa na bamasabula Mbura agu.

⁸ Bamatasanga rie: Tubalasianu dikasi diotsu!

⁹ Tunyensa mbura tsiotsu tsiduyitsu o bulongu. Tugemuegulu mangolu magu, babiyitsi basatsiʼ Je tulaba mambu memama mutubu?

¹⁰ Aa Nsambi, te na temu yi muvinitsi osiengilanga? Te na temu yi olensanga diina diagu?

¹¹ Dibandu yi gutsibusila utuwamusa? Kokolu tsiagu, bunga muvinitsi!

¹² Kala kala Nsambi avu kaga ami. Gumatugobulanga temu tsipuela.

¹³ Na mangolu magu gumapasa mubu; gumabunga mikuimbi o mubu;

¹⁴ gumaminyiga miuru, gumamivega bisi kumu abamamiji.

¹⁵ Gumabasa bileka na mijamba. Gumakamusa mijamba amigekamuyingi na kala.

¹⁶ Nyangu na mukolu abiagu; ndeʼ gumasunda tsungi na wisi.

¹⁷ Ndeʼ gumavaga mandilu motsu mabulongu, ndeʼ gumavaga mfula na mangala.

¹⁸ Fumu, rangimina diambu diedidi: muvinitsi usienga esiengi, biduka ulensa belensi.

¹⁹ Guyawakisa abagu ombu bibulu bibukanyi, guyalibana abamakambulu mutubu!

²⁰ Rangimina pangini agu! Bango dikasi ubasa bebasi dilongu.

²¹ Agumakambulu ayagabuga tsokudu na yisonyi: abamakambulu nesi bijaga baguyitsingi!

²² Aa Nsambi, kokolu tsiagu, kwaki kalala! Rangimina bisiengu bibiduka, usienga begusiengi yilumbu na yilumbu!

²³ Guyalibana migamu mibavinitsi bagu, nesi kumfu tsiogu atsigaa yilosi, atsigulunungu ombu gagu.