Nyimbu 69 - La Sainte Bible en Langue Yipunu

DUIMBU Durondu adu nyirondi Ndagu Nsambi

¹ Duimbu duyivunda yibawimbitsi na duDavid adumawimbulu na bitara.

² Aa Nsambi, kobuli! Yika udiama nyidiami mu mamba.

³ Nyitsudimi mu diobu, ngorungula ukefula; nyimaputama va yitsiba, mingiba mimandiamisa.

⁴ Nyiji vana ugamuga nyigamuyi, mungungaami umagumuga; misu yika mamba ava nyivivili Nsambi ami.

⁵ Jogu abepini, ne ngaa na diambu bavu bapuela ne uviolila dutalu dunanga tsiami. Jogu aberondi unsiemusa bana mangolu maneni! Vengu nyugabusa abi nyisamadaga!

⁶ Aa Nsambi, ndeʼ guijabi buduka buami, nyisamagusueyila nsimbulu tsiami.

⁷ Aa Fumu, ndeʼ guvu Fumu mabadi, ngerondi yiri abamaguvayila yitu bolaba yisonyi mu diambu diami. Aa Nsambi Israel, guyasingisa basigama bagu ulaba yisonyi mu diamabu diami.

⁸ Mu diambu diagu nyiwarili bisiengu, bionyi bimandasa yisonyi,

⁹ nyivu nderi muenyi ombu baana bataji bami nderi ngejabunu na mukuta ami.

¹⁰ Durondu duNdagu agu duvu nderi muji o gari murima ami. Bisiengu abi begusiengi bikengili.

¹¹ Ulila nyilili na nyibusi uji, amana metombisi bisiengu.

¹² Nyimaduara yifila na nyivu nderi kwaku ogu.

¹³ Abana batsana va gusu kana beposilingi mambu, nesi balangitsi bekwimbililingi nyimbu.

¹⁴ Nyigusambili dusambu duami! Aa Fumu, ajiji jivu temu jiwelimina ukwagula. Aa Nsambi, na yingeba yiagu yineni, nyijabi yiri gukobula kabogu kwaguli.

¹⁵ Mfuli yiri ngoviolila udiama! Kwaki kalala ombu bavinitsi bami nosabula va yitsiba.

¹⁶ Mingiba miyadibiga, ndonga jiyandiamisa, nyiyakota o ngila.

¹⁷ Aa Fumu kwaguli mu mbari maboti magu mavu maneni. Kengili na durondu duagu duneni, guyaliyija musalitsi agu nsima!

¹⁸ Munyongu nyilabi, kokolu tsiagu, lensa nokwagula!

¹⁹ Bambana nami na kwaki kalala! Kobuli ombu bavinitsi bami!

²⁰ Guijabi nana bensiengili nesi yisonyi yiami na nana bendensili; guilabi bavinitsi bami botsu.

²¹ Bisiengu bimambulisa murima te na nyibelingi; nyivivi ulasu yingeba, kondini! Nyivivi mbembugulu, ngedilinejimosi.

²² Betsatsi nsungi mu biguji biami, uvotsa puila ami benduisi dive diganyi.

²³ Milambu miogu miyingitsi miukaluga te na mibi nderi mirambu amiubawakusulu.

²⁴ Misu mogu matsimi, bayamuelaba maguga mogu mababandiyi.

²⁵ Balasi kabu agu nesi yifutsu yiagu yineni.

²⁶ Milaku miogu misiali mududu, mutu ayatsana muna, via!

²⁷ Jogu bekuani agu ndeʼ gumadimba bebuesi maguga majogu aba ndeʼ gumanemisa kala.

²⁸ Tala mabi mogu te na bagomuelasu yingeba yiagu.

²⁹ Miina mogu matsindulu mu dibuku dimonyu bayasonugu va mosi na batu basigama.

³⁰ Menu nyimakambulu na nyibelingi, Aa Nsambi, kokolu tsiagu kwamusi!

³¹ Nyuguyitsanga na nyimbu nyuyitsanga buneni buagu.

³² Fumu adina digulasi ubueji ne uviolila ngombi aji nyuguvagulila, ne mulumi ngombi aguvu na masiyi na birodi.

³³ Mavolambombu abamakambulu bolabila dujegusu duami nosangila. Jenu aduirombi duwamusu duNsambi, sangilanu!

³⁴ Mu mbari Fumu egulu abamakambulu, agelibini basigama bandi ava bavu o tsugu.

³⁵ Bisi julu na butamba muyitsianu, nesi mubu na biotsu abivu muna.

³⁶ Nsambi ogobula Sion na orungulila misiengi miJuda, batu bandi botsana muna miuba miogu.

³⁷ Bategula babasalitsi bandi bomidila disiala, jogu aberondi Fumu bodila mbura muna.