Nyimbu 65 - La Sainte Bible en Langue Yipunu

DUIMBU Nsambi ndeʼ guvu uwelimina uyitsu

¹ Duimbu duyivunda yibawimbitsi na duDavid.

² Aa Nsambi, baguyitsi o musiengi uSion, badugusu pangini atsi bamavangana nagu,

³ Aa ndeʼ aguigulu dusambu! Batu botsu baruyi ombu gagu

⁴ na mabi amebakambisi. Nsimbulu tsietu tsimatuviolila, ndeʼ gurungula utsitsiemusa.

⁵ Ka muna ubueji gu uvu na jandi agu ndeʼ guisoli, agumabambana nagu utsananga o ndombili tsiagu! Jetu tutopulu maboti magu na miula amivu o Ndagu agu wandi.

⁶ Nsambi Mugobutsi etu ndeʼ guvu usigama, ndeʼ guituvayili mambu magu maneni, ndeʼ agu tuivayili yitu, nesi bisi masuka mabulongu nesi bisi banyingi.

⁷ Nsambi, guiwarisi mikongu na mangolu magu guvu na tindi mangolu.

⁸ Guivotsi mungudi umubu nesi nduku jimibiji nesi kumfu jibatu.

⁹ Jogu abetsani o masuka mabutamba belabi tindi goma ava belabili bimaga biagu; guibasi bisi tandu na bisi banda na nsangu.

¹⁰ Guidokimini bisi butamba; guibaveyi digumba, guibaveyi busina; mujamba uNsambi umabasa de; guiveyi tsangu, guirombisi butamba digumba:

¹¹ guitindi mfula jiwelimina udetsa migondu amiubasa mamba, guimuemidetsa na masala, guibendisi bivaru.

¹² Ka muna digumba di mu yilima yieni, mbura tsiotsu atsi guivioyi yika digumba na digumba.

¹³ Kumu tsiotsu yika migamba na migamba mikongu mibasa de na biwelimina nogu.

¹⁴ Yiari na yiari yika bindombu na bindombu, bibususu bibasa de na digumba. O musiru migamu minsangu na nyimbu bigulunungu.