Nyimbu 62 - La Sainte Bible en Langue Yipunu

DUIMBU Ombu Nsambi buandi nyubanganga sui

¹ Duimbu duyivunda yibawimbitsi na duDavid, kwimbitsi jiYedoutoun.

² Ombu Nsambi buandi nyubanganga sui. Dugobutsu duami duiruyili ombu gandi.

³ Jandi buandi avu dimanyi na yisuemunu, nesi mugobutsi ami. Ngopupusu via!

⁴ Tenatemu yi dulasilanga mutu maguga nomudimbanga nderi avu yivaga ayimasiendama ayivu na maluta?

⁵ Bamatunga fundu umubondusa va yitsiga yiandi; berondi mfurulu. Na miunu miogu begabili miula tumba o gari tsi mirima uloga beloyi. Letasatianu

⁶ Ombu Nsambi buandi nyubanganga sui. Mami motsu meruyili ombu gandi.

⁷ Jandi buandi avu dimanyi na yisuemunu, nesi mugobutsi ami. Ngopupusu via!

⁸ Dugobutsu duami na bundumba buami bivu ombu Nsambi. Nsambi avu dimanyi diami adinsueyi, jandi avu yisuemunu yiami.

⁹ Jenu batu keveganu ombu gandi temu tsiotsu! Veganu mirima mienu ombu gandi; Nsambi avu yisuemunu yietu! Letasatianu

¹⁰ Nyiina, batu bagaa na tsongu; mindumbu bavu bafuritsi! Ne pa bomata botsu mu mudodu bavu viagaa nderi mikondu.

¹¹ Duyavayila dikasi yitu nesi udaga ugaa na tsongu pa busina buenu buifimingi duyakevega mu buonyi!

¹² Nsambi amadivosa temu mosi nyimaguhi diufi diandi amavosa rie: Mangolu motsu meruyili ombu gami.

¹³ Aa Fumu, ndeʼ guvu na maboti, guisaki mutu mutu nana amasalila.