Nyimbu 59 - La Sainte Bible en Langue Yipunu

DUIMBU Nsambi ami kwaki kalala ombu batu abepini

¹ Duimbu duyivunda yibawimbitsi na duDavid adumawimbulu na kingu jiGuyabunga ava Saul amarumina batu uyitsiengila ndagu uboka David.

² Nsambi ami! Kwaki kalala ombu batu abepini, nsueyi yiri bavinitsi bami bagondaba!

³ Kwaki kalala ombu batu babi, kobuli ombu bikongu!

⁴ Labati, ulega bendeyi, berondi umboka; bamatungila fundu ne pa ngaa na mbela, ne pa nyisamavaga masumu,

⁵ ne pa nyisamavaga dibi, utsiengila bensiengili. Lerambugati, ruga uyikengila.

⁶ Ndeʼ Fumu Nsambi mabadi aguvu Nsambi Israel, kokolu tsiagu, kilisa bapayi beni, guyabalasa yingeba! Letasatianu

⁷ Begabuyingi kadi tsisiga; benyingi nderi bamondi, beyenatsiengilanga musiengi.

⁸ Guluati beyenavosanga mabi, posulu tsiogu tsivu nderi majenga; anyi obagulu?

⁹ Ndeʼ Fumu, guibareki, guidesi bapayi beni.

¹⁰ Yika ndeʼ nyitasili, ndeʼ Nsambi guvu yisuemunu yiami.

¹¹ Nsambi ami aguitondi, otasuna, onsingisa ugengila dubetsu dubavinitsi bami.

¹² Guyasunda ubaboka mu mbari batu bami bakelibana ndungulu agu. Yenabalinsanga na mangolu magu na babungi. Fumu, ndeʼ guvu ngubu etu.

¹³ Posulu tsiogu tsiotsu tsivu yika masumu na masumu. Dunangu duogu dubi nderi murambu agubagaanga, mu mbari bevosingi yika ndogulu na mfurulu!

¹⁴ Babungi na kabu agu; babungi tindi ubunga te na bagomuelabana! Bajabi yiri Nsambi erumi Israel te no masuka mabutamba. Letasatianu

¹⁵ Bagabuyingi kadi tsisiga, benyingingi nderi bamondi, beyenatsiengilanga musiengi.

¹⁶ Belingingi yiari na yiari uyenarombanga biguji, beviosi mikolu tsiri ugukuru.

¹⁷ Menu nyukakisanga mangolu magu; kadi kedi nyuyitsanga maboti magu mu mbari ndeʼ guvu yisuemunu yiami ayi nyusuemina ava nyulabila munyongu.

¹⁸ Aa Mangolu mami! Yika ndeʼ nyuyitsanga mu mbari ndeʼ Nsambi guvu yisuemunu yiami Nsambi ami ndeʼ aguvu muboti.