Nyimbu 51 - La Sainte Bible en Langue Yipunu

DUIMBU Dusambu du-utsindula dibumi

¹ Duimbu duyivunda yibawimbitsi na duDavid.

² AvaNatan mubiyitsi amawendila ombu David, yiotsu ayi amafubinina yitsiga na Batcheba.

³ Aa Nsambi! Ndasi yingeba, na maboti magu tsindula nsimbulu tsiami;

⁴ nsusi, meʼ uotsu mu mabi mami; ndiomisi masumu mami.

⁵ Nyijabi nyimagulensa, nsimbulu tsiami tsivu vana temu tsiotsu, nyitsilabingi.

⁶ Nyimavaga masumu va gusu agu; nyimavaga amagaa mawelimina va misu magu la dibandu dusungugu duagu dujabunu ava gutabulila bunsonsi; buonyi bugoba na nsimbulu.

⁷ Gulu, nyimaburu mu mabi nguji ami amansamina mu masumu.

⁸ Tumba ndeʼ guirondi yiri mutu abi na ngensa ajiruyili o murima; kabogu basa murima ami na tindi dujabu.

⁹ Tsiemusa nsimbulu tsiami, mbana nyuba ulioma; nsusi na nyuba uvema ve, nana mikondu.

¹⁰ Tubula yiri gumansigila kokolu mbana nyubasa na nsangu nobueji. Diuleba gumakilisa, nyumuesangila!

¹¹ Liyila masumu mami nsima notsindula mabi mami motsu.

¹² Aa Nsambi, nsundili murima ulioma, peyi matasa magona amavu sikiri.

¹³ Guyambuaga vala nagu, guyapatula yinyunyi ayiruyili ombu gagu.

¹⁴ Kabusili nsangu jidugobutsu duagu, kwarisi na Yinyunyi ayiruyili ombu gagu.

¹⁵ Mbana nyulonsa bifu biagu ombu jogu abavu na nsimbulu; mbana bavayitsi bamasumu bogabuga ombu gagu.

¹⁶ Aa Nsambi, Nsambi Mugobutsi ami! Kwaki kalala mu diambu dimalungu amamawitama mbana nyugukakisanga nana gumakwakila kalala.

¹⁷ Fumu dibula munu ami; nyusamunanga duyitsu duagu.

¹⁸ Mbe gumaronda pagu tsiunyensa mbe nyimaguvagulila tsionyi; tumba tsiri pagu tsiunyensa guirondi.

¹⁹ Pagu tsiunyensa atsiulasa Nsambi ubueji la murima agumabuliga. Aa Nsambi, ndeʼ gugelensi murima agumabuliga.

²⁰ Nsambi, lasa Sion yingeba noguwamusa; muerunga bivaga biJerusalem.

²¹ Mbana gusinga pagu tsiunyensa tsiwelimina, pagu tsiunyensa tsibibulu bimfuimbila; mbana boguvagulila balumi babangombi va yinyensulu yiagu yipagu.