Nyimbu 5 - La Sainte Bible en Langue Yipunu

DUIMBU Dusambu dumutu agumasingu na Fumu

¹ Duimbu duyivunda yibawimbitsi na duDavid adumawimbulu na mambika.

² Aa Fumu, liga matuji ugulu mambu mami! Ndeʼ nyisambili dusambu duami.

³ Aa Kaga ami, Nsambi ami ba limba ugulu migamu miami! Ndeʼ nyisambili dusambu duami.

⁴ Fumu, kedi gulu tsambu tsiami. Kedi uviva nyivivi usingu nagu.

⁵ Ndeʼ gugaa Nsambi aguilabi ubueji na mabi. Mutu mubi agaa na mbura utsanina ombu gagu.

⁶ Bango dunangu bagelabini va gusu agu; ndeʼ guivini botsu abevayingi mabi.

⁷ Ndeʼ guitsiemusi bafuritsi; guivini bango dikasi nesi bango penda.

⁸ Mbe ka menu, na yingeba yiagu yineni uwenda nyiwendi o Ndagu agu, nyigudimi na goma o Mbura agu jiyingitsi.

⁹ Fumu guji tindi Nsambi, batu bapuela bepini, kwamusi udugusu duganu duagu, ndonsi adi guirondi yiri nyuvaga.

¹⁰ Bagorungula uvayila posulu tsiogu yitu bagevosi ngensa.

¹¹ Mirima miogu mibasa de na mabi; miunu miogu mibasa de na ndunsulu. Aa Nsambi, baveyi mbela; barombisi ukonda udugusu amogu, batsiemusi mu diambu bimabi mogu; baji mimbini miagu.

¹² Mbe ka jogu abekevega ombu gagu, basangili, batabingi nsangu bawimbilingi ndungulu; botsu aberondi diina diagu. Guvu yisuemunu yiogu.

¹³ Aa Fumu, ndeʼ gugabila abasungama miula; maboti magu mavu ombu gogu nderi ngubu.