Nyimbu 45 - La Sainte Bible en Langue Yipunu

DUIMBU Duimbu dudiwela dikaga

¹ Duimbu duyivunda yibawimbitsi na dubaana bababaala baCore adumawimbulu na yitara. Duimbu dudurondu.

² Murima ami ubasa de na mambu maboti. Nyivosi rie: Duimbu duedudu adu nyitubi duvu dukaga! Duvu duboti nderi bisonu bitindi musonitsi.

³ Ndeʼ guiviolili baana bababaala botsu ubueji, posulu tsiagu tsibasa na minyimu. Dingensa Nsambi amagugabila miula.

⁴ Ndeʼngogaga duara dijenga diagu, lasa mangolu magu na bundumba wandi.

⁵ Nyiina, lasa bundumba buagu. Mata va dikalu diagu na lunga, wamusa abamakambulu na basungama. Salisa dikaka diagu dimabaala udugusu bisalu bineni.

⁶ Mbansa tsiagu tsivu tsitsuela; atsiulasa batu goma, tsiunamu mu mirima mibavinitsi bakaga!

⁷ Aa Nsambi, yitsiga yiagu yibufiunu yiuba mutubu; guirumi bufumu buagu na dusungugu.

⁸ Guirondi dusungugu na guivini mabi. La dibandu Nsambi, aguvu Nsambi agu amagusola; amagugabila nsangu na duyitsu uviolila abimavegu ombu bambatsi.

⁹ Muyombu agumavagu na mira na alowe nakasa bivandumusi biduaru biagu mbunga.

¹⁰ O mandagu mabapungi bamagusiyila bisigu ugulasa nsangu. Baana babagetu babakaga bavu bambatsi bagu; kaga jimugetu avu va mabaala magu aduara lora jitindi lora.

¹¹ Legulati mugatsi kaga, gengila noliyila dituji; libana batu bagu nesi ndagu taji agu.

¹² Kaga arondi kembu agu; avu fumu agu kabogu kutama va gusu andi.

¹³ Bisi Tyr abavu na milendu nesi busina uruga beruyi uyigulenda.

¹⁴ Muana mugetu ukaga uruga eruyi na bundumba nesi yiduaru yiandi yimabaku lora.

¹⁵ Eduari biduaru bimaruku bisonu bipuela, amawakusu ombu kaga; banumba basusu bamayenamudukanga, ukota bekoti nandi.

¹⁶ Bamabakotisa o ndagu na nsangu nobueji, nyiina, bamabakotisa o ndagu kaga.

¹⁷ Aa kaga, baana bagu bababaala bavingi va mbura jibakaga bagu. Bavayi bakaga babulongu buotsu.

¹⁸ Mbe ka menu nyurangiminanga diduma diagu ta na kula tsiotsu. Batu botsu boguyitsanga tindi uguyitsanga.