Nyimbu 41 - La Sainte Bible en Langue Yipunu

DUIMBU Dusambu du-agumakuanu

¹ Duimbu duyivunda yibawimbitsi na duDavid.

² Ka muna ubueji gu uvu na jandi aguikipi abamakambulu! mu yilumbu yiandi yimaguga Fumu omuwaka kalala.

³ Fumu emubambi yiri agoboku. Emulasi nsangu vava tsi, agumusingisa ulasu kabu na batu abemuvini.

⁴ Fumu emuwarisi ava ebelili; elengisi murima andi na maali mandi motsu.

⁵ Mbe ka menu, nyivosi rie: Fumu, ndasi yingeba! Mbelusi! Dingensa nyina mbela va gusu agu.

⁶ Batu abepini bewivuli na bukanyi rie: Temu yi ofuila?

⁷ Temu yi diina diandi diutsiemuyila? Pa mutu eyindokimina, evosi posulu tsikulini; efuri ava ewendili eyenatsivosa va dulombili.

⁸ Batu botsu abepini beyenaposilanga mafundu; belabi purulu tsiami tsiutombisa ubungana.

⁹ Bevosi rie: Ngeba jandi aji diera! Labatianu amasilama, agomuesimbuga via!

¹⁰ Nesi mbatsi ami jimurima agu nyimavayilanga yitu nesi agumajanganga biguji biami, amakaluga muvinitsi ami.

¹¹ Tumba ndeʼ Fumu ndasi yingeba nomuetetsiga, mbana nyiyabagubusila pila!

¹² Adina diundasa yiri guitondi: pa muvinitsi ami agolunganga.

¹³ Gumakwarisa mu mbari ngaa na mbela, gukelisanga va gusu agu mutubu.

¹⁴ Diboti ombu Fumu Nsambi Israel avu Nsambi ubanda kala te na mutubu. Amen! Amen!