Nyimbu 40 - La Sainte Bible en Langue Yipunu

DUIMBU Botsu bajabi ama gumapayila

¹ Duimbu duyivunda yibawimbitsi na duDavid.

² Nyimaviva Fumu na pugu amakengila ava amagululu mitatu miami.

³ Amapalisa o yiduna yidubungu o yitsiba yipinda mamba. Amateliga va julu dimanyi; amawarisa taka tsiami.

⁴ Amandonsa uwimbila duimbu duyitsila Nsambi etu. Batu bapuela bojaba musuga uFumu; boduma Fumu na bokevega ombu gandi.

⁵ Ka muna ubueji gu uvu na mutu agumavayila Fumu yitu agugefubini na bango dunangu na bafuritsi!

⁶ Aa Fumu Nsambi ami, ndeʼ gumatufunisila bimaga biagu: vagaa mutu agubagunu nagu. Ndeʼ gumatufunisila maboti magu. Bivu bipuela bipuela; ngorungula ubitubula biotsu!

⁷ Ndeʼ gugaa na nsala pagu nesi milendu, gumapandula matuji, gugevondi nesi pagu tsiunyensa nesi pagu utsindula dibumi.

⁸ Nyimavosa rie: Gulu uruga nyiruyi ombu gagu. Mu dibuku diMigaga nyirangi adi vengu nyuvaga.

⁹ Aa Nsambi ami, nyilabi ubueji ugudedila! Migaga miagu mivu o murima ami.

¹⁰ O yibenguna yineni, guigulu, nyisamuningi musamu uboti! Fumu ewaki kalala. Ngoba sui Fumu guidijabi.

¹¹ Ngesueyi nana gumakwakila kalala, nyisamuni dugobutsu duagu, ngesueyi maboti magu nesi usigama uagu.

¹² Aa Fumu, ndeʼ gugobusa undasa yingeba; maboti magu na usigama uagu biukelisanga.

¹³ Purulu tsipuela tsipuela tsinsiengili; mikilu mimabi mami mimakaanga; ngomuerungula nesi umigengila. Mivu mipuela mipuela nesi uviolila dutalu dunanga tsiami te na mangolu mamansuka.

¹⁴ Aa Fumu, kwaki kalala! Fumu lensa noyikwamusi!

¹⁵ Jogu aberondi unsiemusa bagabuyi mansinsima te na boba tsokudu! Jogu aberondi umboka babetsu va mosi nolasu yisonyi!

¹⁶ Jogu botsu abeteki babetsu; jogu abeposili rie: Joʼ ve!

¹⁷ Basigama bagu botsu balabingi nsangu nogusangilanga! Botsu abegurondi bavosingi rie: Fumu avu muneni!

¹⁸ Menu nyivu yijaga na nyimakambulu; tumba Fumu etangimini! Avu muwamusi ami na mugobutsi ami! Aa Nsambi ami, lensa nokwaka kalala!