Nyimbu 39 - La Sainte Bible en Langue Yipunu

DUIMBU Lepumisa mua pesu, temu uvioga jivioyi…

¹ Duimbu duyivunda yibawimbitsi na duYedoutoun na duDavid.

² Nyimavosanga rie: Nyukebana na posulu tsiami yiri tsionyi tsigotombisa mbela; nyuba na yida-mamba ava mutu mubi obila bebeli nami.

³ Nyimaba nderi dibaba, nyimavola sui, ne diboti ne dibi nyisamawaka. Diguga dimapiolila!

⁴ Murima ami yika ufutsanga, murima ami yika uleluga.

⁵ Mbana nyimavosa rie: Aa Fumu, nsiabisi disukusulu diami nesi bilumbu biami wandi; mbana nyujaba yitsingu yiami yigaa yineni.

⁶ Ka yitsingu yigeyi yi gumapega, dutalu dubilima biami bigaa bipuela. Va gusu agu mutu uotsu, diuleba avu na mangolu avu nderi yiriri ayivembulu. Letasatianu

⁷ Nyiina, mutu evioyi nderi yidumbitsi; nyiina, mandi motsu magaa na divindugulu. Egukiyi busina agejabi anyi obubialila.

⁸ Aa Fumu, anyi nyurungula uvayila yitu? Ndeʼ, nyivayili yitu yiami!

⁹ Kwaki kalala ombu basoyitsi badiela! Guyasingisa biduka undesa!

¹⁰ Nyimavola, ngomuevosa mu mbari ndeʼ aguipayili nana.

¹¹ Guyamuekilisa, nyiji bebeli nofu na mikasa miagu.

¹² Ava guikilisili mutu guimunangusi mufuna udibi diandi; guibungi biandi biboti dedi mosi nana bamburutotu bebungili. Nyiina, mutu uotsu avu nderi yiriri ayivembulu! Letasatianu

¹³ Aa Fumu, gulu dusambu duami nesi mitatu miami; guyaliyila matsanga mami nsima! Nyivu muenyi ombu gagu, uvioga nyivioyi dedi mosi nana bataji bami.

¹⁴ Lepumisa mua pesu yiri nyumuebanganga na mua nsangu ne ngaayenawenda, ngomueba.