Nyimbu 38 - La Sainte Bible en Langue Yipunu

DUIMBU Dusambu duyibedu ayirangimisi nsimbulu tsiandi

¹ Duimbu duDavid dupagu jiyirangumunu.

² Aa Fumu, guyansiemba na kabu agu na guyakilisa na kabu agu.

³ Nyivu nsunda jimbansa tsiagu yigaba yiagu yimambeta va tsi.

⁴ Ngaa na yilema ne yimosi ayivu buranga mu diambu dikabu agu, nyisaa na mangolu mu nyuru tsiami mu diambu dinsimbulu tsiami.

⁵ Mbela tsiami tsivu va julu muru ami tsivu mufuna agumapiolila utsira.

⁶ Mapura mami mavu yika mbunga na mafinyi mu diambu dibuduka buami.

⁷ Nyimabandama na nyimadimbu tindi udimbu; yilumbu yiotsu nyiduaringi yifila.

⁸ Nyina dibagu, ngaa na yilema ne yimosi ayivu buranga.

⁹ Ngaa na mangolu, nyuru yika volongu; murima ami yika o juhi na nyitatingi na buali.

¹⁰ Aa Fumu, matasa mami motsu guimalabi na utsukama uami umagulunu.

¹¹ Murima ami umapupusu na mangolu mamansuka na misu yika dimungi.

¹² Bambatsi bami na abenjabi berini pura ami nesi mukuta ami bamakakana nami.

¹³ Jogu aberondi umboka bamatambila mirambu; jogu aberondi unsiemusa bana ditasa upuna; temu tsiotsu berangimini yika utambila mirambu.

¹⁴ Tumba menu nyivu nderi madiba, ngegulu; nyivu nderi dibaba, ngebakuli.

¹⁵ Nyivu nderi dibaala adigegulu adigaa na kabusulu.

¹⁶ Aa Fumu, nyiguvayili yitu. Aa Fumu Nsambi ami ndeʼ gugokulu?

¹⁷ Nyivosi rie: Guyabasingisa umbetsa, bayandesa pa nyusietuga!

¹⁸ Nyububeruga nyugulungu buali temu tsiotsu.

¹⁹ Nyiina, nyisingi mbela tsiami, munyongu nyilabi mu diambu dinsimbulu ami.

²⁰ Batu abepini bagebeli na bana mangolu, diuleba nyisamavaga diajnbu jogu abepini bavu bapuela bapuela.

²¹ Bekabusili dibi va julu diboti; bepini mu mbari nyivayingi maboti.

²² Aa Fumu Nsambi ami, guyandiyila nsima na guyakakana nami!

²³ Aa Fumu, ndeʼ aguvu Mugobutsi ami, lensa nokwaka kalala!