Nyimbu 37 - La Sainte Bible en Langue Yipunu

DUIMBU Guyanyoga pa batu babi bagokambulu

¹ Duimbu duDavid. Guyanyoyila batu babi, guyawava jogu abevayingi mabi:

² bekuduyi mbangu ne uviolila kembu jibiriri; begumuyi nderi biriri binyelili.

³ Kevega ombu Fumu novaganga maboti; tsananga buranga na bisi bulongu, noyelabanga ubueji.

⁴ Fumu abi maboti magu motsu mbana oguvayila ama guvu na nsala.

⁵ Wakisa mambu magu ombu Fumu, muvayili yitu na oguvayila mawelimina.

⁶ Jandi orombisa maboti magu ulabana nderi yijalala ayilulingi na dusungugu duagu dubanganga dedi mosi na wisi.

⁷ Ba sui va gusu Fumu muvivi na pugu. Guyanyoyila oyilungi mu bisalu biandi nesi jandi oyidugusu kanu tsiandi tsibi.

⁸ Guyanyoga. Guyaba na kabu. Guyaketsoyisa, motsu mana magoguwamusa.

⁹ Batu babi bogusulu tumba abamavayila Fumu yitu bodila bulongu.

¹⁰ Mua pesu temu mutu mubi agomueba; gugengila mbura aji abetsi, gulaba yiri amatsiemuga.

¹¹ Bimbesi bodila bulongu, bosangilanga na digumba diogu.

¹² Batu babi betungili abasigama fundu na bebavini tindi uvina.

¹³ Tumba Fumu ureka ebareki, elabi yiri bilumbu biogu bika bebeli.

¹⁴ Batu babi bamasomuna majenga mogu; bamaduta pita tsiogu ubokisa aguilabi munyongu nesi yijaga notabula miuru mijogu abeduki nsila jiwelimina.

¹⁵ Bamaketoba mirima na majenga mogu na pita tsiogu tsimatabuga.

¹⁶ Mua pesu ajivu na mutu usigama jiviolila digumba dimutu mubi,

¹⁷ Fumu egusuli mangolu mabatu babi tumba ewarisi batu basigama.

¹⁸ Fumu ejabi bilumbu bibatu abagaa na nsiembu na disiala diogu ditsingi mutubu.

¹⁹ Bagokambulu mu temu maguga; bogukuru va temu dungosu dunsala.

²⁰ Nyiina, batu babi bobungana bavinitsi baFumu botsiemuga nderi biriri binyelili, bobungana na botsiemuga nderi nsumbili.

²¹ Mutu mubi esombi tumba agegabusi; mutu usigama ana yingeba na eveyingi.

²² Batu aba Nsambi egabili miula, bodila disiala, tumba aba eloyi botsiemuga.

²³ Fumu ewendisi mutu, elabi ubueji ava emudukili.

²⁴ Pa esietuyi ageberuyi va tsi mu mbari Fumu emugaangi.

²⁵ Nyimaleba mufudu, nyimanuna; yiotsu yina nyisakalaba yiri Fumu amaliyila mutu usigama nsima na nyisakalaba baana bandi uvondanga biguji.

²⁶ Ebangingi na yingeba na esombisingi; baana bandi begabulungu miula.

²⁷ Liyila mabi nsima, vaganga maboti na gudilanga disiala diagu,

²⁸ mu mbari Fumu erondi dusungugu na ageliyili abandi basigama nsima. Batu babi botsiemusa mutubu, yifumba yimutu mubi yiubungu.

²⁹ Batu basigama bodila bulongu abu botsaninanga mutubu.

³⁰ Mutu usigama olasa diela, na otubula dusungugu wandi;

³¹ mu mbari ekelisi migaga miNsambi andi, agesietuyi.

³² Mutu mubi eleyi mutu usigama; ana nsala umuboka.

³³ Fumu agogaru, agomusingisa udila mbela ava otabululu bunsonsi.

³⁴ Tasila Fumu, dedila maruma mandi, jandi ogukelisa yiri gubialila bulongu; gulaba diberugulu dibatu babi.

³⁵ Nyimalaba mutu mubi agumalasanga mangolu mandi; amakelasa nderi muiri aguvu swalala.

³⁶ Labati, amavioga na amatsiemuga; uromba nyimurombi tumba agemuelabana.

³⁷ Wiji musinganyi, gengila aguvu usungama, mungo duvotsu obanganga na maboti.

³⁸ Tumba mimbini miotsu mimabungu, bategula bamutu mubi bamatsiemuga.

³⁹ Fumu egobuli batu basigama, avu yisuemunu yiogu mu temu maguga.

⁴⁰ Fumu ebawamusi na ebawaki kalala; nyiina, ebawaki kalala ombu batu babi; ebagobuli mu mbari berombi yisuemu ombu gandi.