Nyimbu 35 - La Sainte Bible en Langue Yipunu

DUIMBU Dulembu du-agugaa na mbela agumabegu o bunsonsi

¹ Duimbu duDavid. Fumu kwaki kalala na batu abepini. Toyisa jogu abetoyisi.

² Bonga ngubu jigeyi na jineni nokwamusa! Kokolu tsiagu Fumu, kwamusi!

³ Lasa batu abekuani dikongu na dijenga diagu! Nyigulu guivosi rie: Nyiji Mugobutsi agu.

⁴ Jogu aberondi umboka babetsu nolasu yisonyi! Jogu abetungili fundu basiali miogu na miogu.

⁵ Babi nderi ndela ajimavembulu na punga, ava yiansa yiFumu yibabingili;

⁶ nsila ogu jibi yika pisama na puelili, ava yiansa yiFumu yibadukili!

⁷ Diuleba ngaavaga diambu bamatambila dubila umbokila.

⁸ Dubungu dusundila ubagaanga; bawakululu jogu beni mu murambu agu bamatambila, batsudimi mu dubila dueni na babungini guna!

⁹ Mbana nyusangilanga Fumu, nyulabanga nsangu na duwamusu duandi.

¹⁰ Nyikewivula rie: Fumu, anyi avu dedi nagu? Tsiri ndeʼ aguiwaki abadeda kalala ava bango mangolu bebalasili maguga? Tsiri ndeʼ aguiwamusi abekambusu ava bekindulu?

¹¹ Bambeji bamfurulu bamaretsama: bamakwivula ama ngejabi.

¹² Bamakabusila dibi va julu diboti, meʼ nyivu waʼ pinsa.

¹³ Ava jogu bamabelilanga nyimalabanga munyongu, nyimabusa nesi uji, nyimaketsoyisa usambilanga!

¹⁴ Nyimawendanga na miogu va julu muru nderi nyimabokisa mbatsi nesi muana nguji. Nyimaduara yifila nderi nyimabokisa nguji.

¹⁵ Tumba ava nyimapupusu jogu bamagukama usangila, nesi benyi bamagukama uyenandesanga nosienganga.

¹⁶ Batu babi na bango penda bendesi na bepini tindi upina

¹⁷ Aa Fumu te na temu yi ubagengilanga yika ugengila? Kwaki kalala na bimbungu bieni.

¹⁸ Nyuguyitsanga o yibenguna yineni; nyugukakisanga va gari batu bapuela bapuela.

¹⁹ Guyasingisa abepini usangila ubetsu uami! Guyasingisa batu upina mavivina nesi unsienga ava bekengilili.

²⁰ Bagaa na posulu tsiwelimina, berombisi bisi bulongu abagaa na diambu musosi.

²¹ Bensimini bevosi rie: Joʼ ve! Tuigulabi!

²² Fumu ndeʼ guilabi! Guyaba sui! Guyakakana nami!

²³ Kokolu tsiagu Nsambi, lerambugati utabulila bunsonsi buwelimina. Aa Nsambi lerambugati na dusungugu duagu!

²⁴ Fumu ndeʼ aguvu usungama, ndasi usungama; Nsambi ami, mutu ayamuetekisa.

²⁵ Guyasingisa abepini uvosa rie: Diwelimina, adina tumaronda! Bayavosa rie: Tumamubetsa.

²⁶ Botsu bana babetsu nolasu yisonyi, nesi abesangili ava nyilabili maguga; nesi abekematisa undiamisa; gukabapatula botsu digoba diogu.

²⁷ Tumba abesangili ulunga uami, bawimbilingi rie: Bundumba ombu Fumu oyirondi ulasa musalitsi andi maboti.

²⁸ Mbana nyutubula usigama uagu, nyumueguyitsanga bilumbu biotsu.