Nyimbu 34 - La Sainte Bible en Langue Yipunu

DUIMBU Fumu amakusulila goma

¹ Duimbu duDavid ava amafurila bulagu ombu Abimelek ava amabingusulu nandi.

² Nyigabusilanga Fumu diboti temu tsiotsu; nyiina, nyumuyitsanga temu tsiotsu.

³ Jetu nenu tumuyitsianu, botsu abamakambulu bagulu nosangila.

⁴ Tutubulianu maneni maFumu jetu nenu tuyitsianu diina diandi.

⁵ Nyimaromba Fumu jandi amakwagula; amakwaka kalala mu goma tsiami tsiotsu.

⁶ Gengilanu Fumu, musangilianu, duyasingisa yisonyi udugaanga!

⁷ Ava agumakambulu egamuyili, Fumu egulu, emuwaki kalala mu purulu tsiandi tsiotsu.

⁸ Yiansa yiFumu yikelisi jogu abedumi Fumu, ebawamusi na bidungu biogu.

⁹ Labatianu, Fumu avu muboti! Ka muna ubueji gu ombu jogu abamakevega ombu gandi.

¹⁰ Jenu aba Nsambi botsu, dumanu Fumu! Jogu abamakesunsa va gusu andi bagegambu na yima.

¹¹ Baana babimbungu begulu kunyi na begulu nsala, tumba jogu aberombi Fumu bagegambu na yima.

¹² Ruganu baana bami, yikuluanu! Nyudulonsa uduma Fumu.

¹³ Anyi erondi utsananga buranga? Anyi erondi usakiga yitsingu yiandi nolabanga maboti?

¹⁴ Ayaloganga, ayafuranga,

¹⁵ ayamuevaganga mabi; avayingi yika maboti.

¹⁶ Atsaningi buranga na batu botsu. Fumu egengili batu basungama egulungu migamu miogu.

¹⁷ Fumu eliyili batu babi nsima, egusuli yirangumunu yiogu va butamba.

¹⁸ Ava batu basungama begamuyili, Fumu ebagulu, ebawaki kalala mu purulu tsiogu tsiotsu.

¹⁹ Fumu avu bebeli na jogu abelabi munyongu, ewaki abamatsiemusa tsongu kalala.

²⁰ Mutu usungama ewarili purulu, Fumu emuwakingi kalala,

²¹ Emukelisi, jaʼ uotsu, ne yivisi yiandi yimosi yigotabulu.

²² Mutu mubi oboku na mbivulu tsiandi, batu abevini mutu usungama bakilusu.

²³ Fumu ewaki basalitsi bandi kalala, botsu abamakevega ombu gandi bagomuedila mbela.