Nyimbu 31 - La Sainte Bible en Langue Yipunu

DUIMBU Fumu ndeʼ guvu yisiku yiami

¹ Duimbu duyivunda yibawimbitsi na duDavid.

² Aa Fumu, nyimakevega ombu gagu, nyiyalasu yisonyi, via! Kwaki kalala na dusungugu duagu!

³ Ndiyili dituji diagu, lensa nokwamusa! Ba nderi dimanyi adivu yisuemunu yiami na yivaga ayiuba dugobutsu duami.

⁴ Ndeʼ guvu dimanyi diami. Na usigama uagu, ba mulonsi ami unsila na mubungulitsi ami.

⁵ Ndeʼ gukusula mu murambu agu bamatambila mu mbari ndeʼ guvu yisiku yiami.

⁶ Fumu nyikewakisa ombu gagu, Nsambi ndeʼ aguvu muwamusi ami.

⁷ Nyivini abeduki bakosi bakulini, nyikeveyi ombu gagu.

⁸ Nyulabanga nsangu nobueji mu diambu dimaboti magu mu mbari gumalaba maguga marni gumajaba munyongu ami.

⁹ Gusamakwakisa ombu batu abepini; gumambega mu nsila ajivu vumbila.

¹⁰ Kokolu tsiagu Fumu, ndasi yingeba, munyongu nyilabi; misu mami yika tsasa na munyongu; ngemuelabingi buranga.

¹¹ Munyongu umagufisa monyu ami nesi bilima biami uvioga bivioyi; mangolu mami mamasuka mu diambu didibi diami te na bivisi biami yika uganyi.

¹² Batu botsu abepini bamandasanga yisonyi nesi abebambini nami betekisi; bambatsi bami bendabi goma; jogu abendabi o dulombili betini vala.

¹³ Nyimalibunu na botsu nderi nyimafu; nyiji nderi yitsatsu.

¹⁴ Nyimagulu tasulu tsikulini tsibatu bapuela bapuela nesi yomumu ayivu yiari na yiari; bebenguni va mosi utungila fundu, bamatabula diambu umboka.

¹⁵ Aa Fumu, nyikevega ombu gagu! Nyivosi rie: Ndeʼ guvu Nsambi ami!

¹⁶ Nyiji o tsi dukelusu duagu; kwaki kalala ombu abepini nesi bakuanitsi bami!

¹⁷ Kengili na mamunga, kobuli na durondu duagu!

¹⁸ Aa Fumu, nyiyabasu na yisonyi ava nyigunengilili. Batu abagekipi yitu nesi migaga balabi yisonyi! Bawendingi nana biduka o mbura jiabafu!

¹⁹ Bavayi mababa bafuritsi abefuengili basungama, bavu bango dunangu na bekematisa!

²⁰ Aa Fumu, ka muna maboti ma ama guisueyili jogu abegudumi. Ka muna maboti ma guilasingi ombu jogu abekerombila yisuemunu ombu gagu va misu mabatu.

²¹ Guibasueyi o nsima agu yiri abebakuani bagobabemba; baji o yisuemunu yiagu kabogu ne bisiengu bibatu abebavini bagomuebabemba.

²² Diboti ombu Fumu! Mu mbari amandasa maboti mandi nderi nyivu o musiengi ukandu.

²³ Nyimalaba goma na nyimatasa rie: Amandiyila nsima! Tumba gumagulu dulembu duami ava nyimagutatila.

²⁴ Jenu aba Nsambi, rondanu Fumu! Fumu ekelisi batu basigama tumba ekilisi tindi ukilisi bango dunangu.

²⁵ Waranu na warisanu mirima mienu jenu botsu aduitasili Fumu!