Nyimbu 28 - La Sainte Bible en Langue YipunuDUIMBU Dusambu dumutu aguvu ulabilila va murima 1 Duimbu duDavid. Aa Fumu, ndeʼ nyitatili; ndeʼ aguvu Dimanyi diami, guyabusa ugulu diufi diami. Pa gugokwagula yika ufu nyifu. 2 Gulu mitatu miami ava nyuvondila duwamusu duagu, ava nyusambila miogu o Mbura Nsambi agu ndeʼ guvu. 3 Guyamfubana mu dubungu dubatu babi nesi bavayitsi bamasumu. Bevosi mambu maduvotsu ombu bambatsi bogu tumba mirima miogu mibasa na mbivulu. 4 Bagabisili pila dedi mosi na bifu biogu nesi ndunsulu tsiogu. Bavayili nana bamavayila basusu mabi. Basaki yisaku yiwelimina nogu. 5 Bagekipi abi Fumu amavaga nesi abi amasunda kabogu obabetsa na agomuebareliga. 6 Diboti ombu Fumu! Jandi egulu mitatu miami. 7 Fumu avu mangolu mami na avu ngubu ami, nyimakevega ombu gandi. Nyimawamusu; nyilabingi nsangu na nyumuyitsanga na nyimbu tsiami. 8 Fumu avu mangolu mabatu bandi, jandi avu nderi yivaga ayigayi kaga aji amabiatsa 9 Fumu, gobula batu bagu nobagabila miula! Ba mubungulitsi ogu nesi muwamusi ogu te na mutubu. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon