Nyimbu 27 - La Sainte Bible en Langue Yipunu

DUIMBU Fumu epeyingi murima usunda

¹ Duimbu duDavid. Fumu avu yijalala yiami na mugobutsi ami, dibandu yi nyulabila batu goma? Fumu avu mukelisi ami, dibandu yi nyulabila yomumu?

² Pa batu babi bebambini nami uyitumuna nesi umboka jogu beni abavu na tindi mangolu bokerasuna va tsi.

³ Ne pa bagora boromba utoga nami, ngolaba goma, via! Ne pa nyutoga divita, ngotsiemusa yitu.

⁴ Nyiwivuli Fumu diambu dimosi adi nyivu na tindi nsala: nyirondi utsana mutubu o ndagu andi, uyenatasanga maboti mandi, noyenagengilanga mbura andi.

⁵ Kabogu mu temu maguga, jandi okelisa o yisuemunu yiandi. Jandi onsuega o gari ndagu andi; onsanisa va yibuga yiwara.

⁶ Yisonyi yiami yimagusulu kala ombu batu abepini. Nyumuvagulila pagu tsiunyensa nyuwimbila duyitsu duFumu.

⁷ Aa Fumu, nyugunengili, gulu diufi diami, ndabi yingeba, kwaguli!

⁸ Utasa nyitasi adi gumavosa rie: Romba yinsi yiami! Aa Fumu, uromba nyirombi yinsi yiagu!

⁹ Guyansueyila yinsi yiagu, guyandasa kabu agu! Ndeʼ guvu muwamusi ami, guyandiyila nsima, ndeʼ guvu Nsambi, Mugobutsi ami!

¹⁰ Pa taji ami na nguji ami bondiyila nsima ndeʼ Fumu gundila.

¹¹ Aa Fumu, ndasi nsila aji nyuvioyila; mu diambu dibatu abepini, kwendisi mu mansila magu masungama.

¹² Guyakwakisa ombu batu abepini mu mbari bambeji bamfurulu na dikasi diogu bensingisili bumbeji bubi.

¹³ Nyina yitu yiri nyulaba maboti maFumu ama olasa batu bandi!

¹⁴ TasilaFumu! Guyadeda, warisa murima agu. Nyiina, tasila Fumu!