Nyimbu 22 - La Sainte Bible en Langue Yipunu

DUIMBU Nsambi ami Nsambi ami mu mbari yi gumambuayila?

¹ Duimbu duyivunda yibawimbitsi na duDavid adumawimbulu na kingu jiKabi jiKedi.

² Nsambi ami, Nsambi ami mu mbari yi gumambuayila? Dibandu yi gumakakana tsiri ukwamusa? Dibandu yi gugegulu mitatu miami?

³ Nsambi ami! Nyigugamuyili nyangu, tumba gugekwaguli nesi mukolu ngedilingi yivumu.

⁴ Tumba ndeʼ utsana guitsani va yitsiga yiagu ndeʼ agu baIsrael botsu beyitsingi.

⁵ Bataji betu bamakevega ombu gagu; gumabakotisa o yisuemunu;

⁶ bamagutatila gumabagobula bamakevega ombu gagu gusamabalasa yisonyi.

⁷ Ngemuenengulungu dibaala yika yifufu nyivu. Batu bensiengi botsu bendesingi.

⁸ Botsu abendabi bendesi bensimini te na bemuangisi miuru.

⁹ Bevosi rie: Agumakevega ombu Fumu kabogu amugobuli! Fumu emurondi kabogu amugobuli.

¹⁰ Fumu, ndeʼ gumapalisa o moji nguji ami gumapega duvotsu va tulu andi.

¹¹ Ubandila va duburu duami nyimakevega ombu gagu; ubandila avu nyivu o moji mama ami ndeʼ guvu Nsambi ami.

¹² Guyakakana nami ava nyulabila yidungu nesi ava ngobila na mutu ukwamusa.

¹³ Bavinitsi bami bavu nderi balumi bangombi bapuela utsiengila bensiengili.

¹⁴ Bimbungu ugumba begumbi, berondi uyenapopula.

¹⁵ Mangotu mami mamasuka nderi mamba amamapugu; manyogu mami mamasusukuga, murima ami usura uisuri nderi paga dilendi.

¹⁶ Munu ami umagumuga; dulimi duami dumanama o yilansi. Ndeʼ gumakabusa o difufundu.

¹⁷ Dibuli dibatu babi dimasieengila nderi bamondi abedayingi abami; bamakaka mu makaka na mu makulu.

¹⁸ Nyimagasa tindi ugasa te na nyurungula utala ne bivisi biami biotsu! Batu abepini bekengili yisuisu,

¹⁹ bamagabana biduaru biami, bamabuayila yijungi yiami mbanda.

²⁰ Ndeʼ Fumu guyakakana? Ndeʼ guvu mangolu mami, lensa noyikwamusi!

²¹ Kobuli yiri ngoboku na dijenga! Kobuli yiri bamondi beni bagokaka!

²² Kobuli va miunu mibimbungu bieni! Kobuli mu masiyi mabapasa beni Nyiina, gumakulu!

²³ Nyunyavisa diduma diagu ombu bambatsi bami, nyuguyitsa va gari dibuli!

²⁴ Jenu aduidumi Fumu, muyitsianu! Jenu bategula baJacob, mukakisianu.

²⁵ Asamadesa, asamavina agumalasu maguga asamamuliyila nsima tumba amamugulu ava amatatila.

²⁶ Fumu, nyugukakisa va gusu dibuli dineni; nyudugusu pangini tsiami va gusu jogu abegudumi.

²⁷ Abamakambulu bajangingi te na bamagukurungu! Aberombi Fumu bamuyitsi. Batsaningi sui mutubu.

²⁸ Bisi masuka motsu mabutamba barangimini Fumu na baruyi ombu gandi! Mikuta miotsu mimalogu migudimi va gusu andi.

²⁹ Fumu avu kaga, erumingi malongu motsu.

³⁰ Nyiina, bisi butamba botsu abavu na mangolu bogudama va gusu andi nesi abelabululu va murima.

³¹ Bategula bomusalila bovosanga mambu maFumu te na kula tsiotsu.

³² Botsingulanga aboburungu adi amavaga ugobula abandi.