Nyimbu 2 - La Sainte Bible en Langue Yipunu

DUIMBU Kaga aji Nsambi amasola

¹ Dibandu yi kimbu jivu va gari malongu? Dibandu yi batu bavu na matasa makulini?

² Dibandu yi bakaga babutamba bavu bakunsama utoga divita? Dibandu yi jogu na barumitsi bavu na kueru na Fumu nesi kaga aji amasola?

³ Bevosi rie: Tutabulianu mikudu miogu, tubuayianu panga tsiogu valanetu!

⁴ Fumu oyitsani o julu ureka ebareki, udesa ebadesi.

⁵ Mbana evosi nogu na kabu ebalasi goma ava evosili rie:

⁶ O Sion aguvu mukongu ami uyingitsi nyimabiatsa kaga aji nyimasola.

⁷ Nyutubula mugaga uFumu: amansingula rie: Ndeʼ guvu muana ami udibaala! Ubongila namunyi nyiji taji agu.

⁸ Kwivuli na nyuguvega malongu nderi disiala nesi masuka mabutamba nderi abiagu.

⁹ Gumarumanga na mukasa ubudilu, gumapansa nderi mavu bisanga bidiga.

¹⁰ Jenu bakaga banu na diela, jenu bansonsi lubuganu!

¹¹ Salilanu Fumu na goma, reyiminanu misuga andi.

¹² Kutamanu va gusu andi yiri agodunyoyila, yiri dugokambulu mu amenu motsu, kabu andi jigotamba noranga. Ka muna ubueji gu uvu na abamakevega ombu gandi!