Nyimbu 18 - La Sainte Bible en Langue Yipunu

DUIMBU Kaga amolunga amagabusila Nsambi diboti

¹ Duimbu duyivunda yibawimbitsi na duDavid. David, musalitsi Fumu amawimbilila Fumu duimbu duedudu ava Fumu amamuwakila kalala ombu bavinitsi bandi, sinsa viri Saul.

² Nyigurondi Fumu, guvu mangolu mami!

³ Fumu avu dimanyi diami na yisuemunu yiami ayi nyisuemini. Nsambi avu dimanyi diami adi nyisuemini, ngubu ami na mangohi amekobuli na divumunu diami na yisuemunu yiami.

⁴ Nyigamuyi rie: Duyitsu ombu Fumu! Nyimawaku kalala ombu bavinitsi bami.

⁵ Dufu dumakaanga nderi mikudu; dubungu dumandasa goma nderi mipupila;

⁶ ngila jimambamiga nderi nyimatungu na mikudu; dufu dumansutusu nderi murambu.

⁷ Nesi mu munyongu ami nyisambili Fumu, nyimasambila Nsambi ami; guna Ndagu andi amagulu diufi diami nesi mugamu ami.

⁸ Butamba bumakungusu na bumaregama, mabandu mamikongu mamapupa, bimasisana mu mbari Fumu amanyoga.

⁹ Nsumbili jimapalila miunu mimbasu andi, muji aguisielisini umapalila munu andi; magala mamapansiga yiari na yiari.

¹⁰ Amagudiga julu na amasunduga; vamaba tindi dimungi o tsi matambi mandi.

¹¹ Amanangama va julu yiansa na amapuramuga, amalabana va julu mapapi mapunga.

¹² Amagumba pisama nderi ndagu jitsanda, amapietu maguki mamba na mamungi maneni,

¹³ mu yijalala ayimarelanga va gusu andi mumapalanga magala mamuji.

¹⁴ Fumu amasiga yidumi yiandi o julu, Nsambi Aguvu Uneni amagulusu diufi diandi.

¹⁵ Amatinda mbansa na amapansa bavinitsi bami, amatindanga kaki na amabapansa.

¹⁶ Misilulu mimubu mimalabana dugunga dubutamba dumalabana bukanyi buFumu nesi mabandu mayivumu yiandi.

¹⁷ Guna julu ensambi dikaka na ekaangi, amansambula mijamba mineni;

¹⁸ Amakwaka kalala ombu muvinitsi ami aguvu na mangolu, nombu bavinitsi bami abamapiolila mangolu.

¹⁹ Amansutusu yilumbu ayi nyimalabila munyongu, tumba Fumu amaba tsiku ami.

²⁰ Amansunsa va mbura ajivu vumbila amakwaka kalala mu mbari etondi.

²¹ Fumu amapayila dedi na dusungugu duami, amansaka dedi mosi na ulioma umakaka mami;

²² mu mbari nyimakipa bifu biFumu, nyisamaba na mbela va gusu Nsambi ami.

²³ Maruma mandi motsu mamaba nami, nyisamaliyila migaga miandi nsima.

²⁴ Nyisamaba na nsiembu ombu gandi, nyimakekelisa yiri ngoba na dibi.

²⁵ Fumu amansaka dedi na dusungugu duami na uiioma uami va gusu andi.

²⁶ Fumu, guvu usigama ombu aguvu usigama. Gugesiembi agugaa na nsiembu.

²⁷ Guikelasa ulioma ombu aguvu ulioma. Ombu mutu mubi guimulasi ubiva andi.

²⁸ Ndeʼ guigobuli batu abekesunsa; yisuisu yiagu yisundusi bango dunangu.

²⁹ Aa Fumu ami, nyiina guvu yijalala yiami guitsiemusi pisama ami.

³⁰ Va mosi nagu nyitumuni dibuli adivu na bitogulu, v na mangolu maNsambi ami nyilobuyi yibaga.

³¹ Nsambi egugu avu mulonsi nsila agugepembusi batu, Mbembu Fumu jigevinsi kingu; avu ngubu jijogu aberondi usuema ombu gandi.

³² Anyi avu Nsambi? Tsiri Fumu? Anyi avu dimanyi? Tsiri Nsambi etu?

³³ Nsambi oyipeyi mangolu, ekwendisi mu nsila jisungama.

³⁴ Elengisi makulu mami nderi matsiesi, esunsi va mbura tsinanguga.

³⁵ Esalisi makaka o divita miogu miami miduti pita tsikunga.

³⁶ Fumu dikaka diagu dimabaala dikwarisi; guvu nderi ngubu ajikayi na guikobuli; guikwaguli na guvu mangolu mami.

³⁷ Gumajeyisa nsila ami na ngesietuyi.

³⁸ Nyibingisi bavinitsi bami na nyibabungi. Ngegabuyi pa nyisakababunga.

³⁹ Nyibabungi na nyibapansi na bagemuerelama via; beberuyi va gusu ami.

⁴⁰ Gumapega mangolu utoga divita, gumasundusa bavinitsi bami.

⁴¹ Guiyingusi bavinitsi bami na betini, nyiboki jogu abepini.

⁴² Begengili yiari na yiari tumba mutu agebawaki kalala! Begamuyili Fumu! Jandi agebawaguli! Nyimabalasa yisonyi te na bamaba tsokudu tsokudu.

⁴³ Nyibaroki te na bekaluyi difufundu adi punga jivembuli; nyibanyiyi na nyibatsirili te na bekaluyi nderi diobu.

⁴⁴ Guipeyi ndunga na misosi mibatu; gumansola uruma malongu; batu aba nyisamalejabanga bamakaluga basalitsi bami.

⁴⁵ Yiotsu ayi begululu diina diami bekululu. Baana bababaala bamuenyi bamabetsu

⁴⁶ bepali mu bisuemunu biogu noregama.

⁴⁷ Fumu ejabi! Duyitsu ombu dimanyi diami!

⁴⁸ Nsambi avu mugabusilitsi ami upila eviosi batu o tsi durumu duami.

⁴⁹ Gumatinisa bavinitsi bami gumakwaka kalala ombu mungo dikasi.

⁵⁰ Aa Fumu ami, la dibandu nyuguyitsilanga! Nyuwimbilanga bundumba budiina diagu!

⁵¹ Fumu elungisi agumasolu nandi; elasi yingeba yiandi ombu yibiatsi yiandi, ombu David na bategula bandi te na mutubu.