Nyimbu 148 - La Sainte Bible en Langue Yipunu

DUIMBU Duyitsu duNsambi o julu no butamba

¹ Yitsanu Fumu! Jenu bisi julu yitsanu Fumu! Muyitsianu jenu aduitsani o tindi julu!

² Jenu biansa biandi biotsu, muyitsianu. Mabadi majulu, muyitsianu!

³ Wisi na tsungi, muyitisanu! Bambuelili botsu, muyitsianu!

⁴ Julu na tindi julu, muyitsianu, mamungi mamfula, muyitsianu!

⁵ Botsu bayitsi diina diFumu! Amaruma na biotsu bimasundu.

⁶ Amabiwarisa mutubu; migaga mimavegu na bigomisumuna, via!

⁷ Bisundu bitsi, yitsanu Fumu, na mikuimbi na biotsu abitsani o ndongajimubu.

⁸ Kaki na mfula jimamanyi na mfula jivema na mamungi, na muji bidugusu maruma mandi.

⁹ Muyitsianu, mikongu na bikundubuga biotsu na miri miotsu amiburi milunda amiligu nesi misedera miotsu,

¹⁰ na bibulu na biruitsi biotsu na bilandila na batsoli.

¹¹ Muyitsianu, bakaga na batu botsu na baana babakaga na bansonsi botsu.

¹² Muyitsianu, bafudu na banumba na binunu na baana!

¹³ Yitsanu Fumu, mu mbari diina diandi divu na diduma, bundumba buandi buvu o butamba nesi o julu.

¹⁴ Amavega dilongu diandi mangolu yiri basigama bandi bomuyitsa, nyiina, baIsrael aba erondi puela. Yitsanu Fumu!