Nyimbu 147 - La Sainte Bible en Langue Yipunu

DUIMBU Mangolu maNsambi

¹ YitsanuFumu! Divu diboti uyitsa Nsambi etu mu mbari avu awelimina uyitsu!

² Fumu amamuerungulila Jerusalem, ugukiga egukiyi baIsrael abamapansiga yiari na yiari.

³ Ubembiga ebembiyi jogu abavu na munyongu na ebuyi mapura mogu.

⁴ Ejabi dutalu dubambuelili, eluyi mbuelili mbuelili diina diandi.

⁵ Fumu etu avu muneni na ana mangolu maneni, dujabu duandi dugorungula utsigusu.

⁶ Fumu eveyi nsangu ombu jogu abamakambulu, elasi batu babi tindi yisonyi.

⁷ Wimbililanu Fumu na kabusulu tsimaboti, yitsanu Nsambi etu na sambi!

⁸ Ekubiyi julu mamungi, enoyisili butamba mfula. Ebendisi biriri mu julu tsimikongu;

⁹ eveyi biruitsi biguji, nesi baana bakavanga ava betatili.

¹⁰ Tsiri mangolu mabakabala amemulasi ubueji; tsiri mangolu mabagora amemulasi ubueji,

¹¹ tumba Fumu elabi ubueji na jogu abemudumi, jogu aberondi maboti mandi.

¹² Aa Jerusalem, yitsa Fumu! Aa Sion, yitsa Nsambi agu!

¹³ Ewarisi maguyi magu na egabili baana bagu miula.

¹⁴ Eveyi bulongu buagu duvotsu, eguveyingi biguji biboti.

¹⁵ Erumi diruma na ditoli mbangu o butamba.

¹⁶ Enoyisi mfula jivema nderi mikondu, ebondusi manogu nderi dibufu.

¹⁷ Enoyisi mfula jimamanyi; anyi orungula uwarila yiotsi yieni?

¹⁸ Yiotsu ayi erumi mfula eni jimamanyi jisulumuyi; evotsi punga andi na mamba mevioyi muwigu.

¹⁹ Ejabisi batu bandi mambu mandi, nesi migaga miandi na maruma mandi ombu baIsrael.

²⁰ Asakavayila bisi malongu masusu mambu mamunongu eni, bagejabi maruma mandi. Yitsanu Fumu!