Nyimbu 145 - La Sainte Bible en Langue Yipunu

DUIMBU Durumu duagu duvu dumutubu

¹ Duimbu duduyitsu duDavid. Aa Nsambi ami, ndeʼ aguvu Kaga, nyigukakisanga! Nyugugabusilanga diboti te na mutubu.

² Yilumbu na yilumbu nyugugabusilanga diboti, nyugukakisanga te na mutubu.

³ Fumu avu muneni na avu tindi uwelimina uyitsu, buneni buandi bugorungula uwetsugu.

⁴ Kadi dukula dukakisi bisalu biagu, dusamuni mangolu magu.

⁵ Nyuvosanga bundumba buagu na buneni buagu nyuwimbilanga mu diambu dibimaga biagu.

⁶ Bovosanga mu diambu dimangolu magu maneni! Menu nyusamunanga buneni buagu.

⁷ Borangimisa maboti magu maneni na bosamuna usigama uagu.

⁸ Fumu avu mungo yingeba na agaa na yifutsu na abasa na durondu.

⁹ Fumu avu muboti ombu botsu, durondu duandi duidugunu bisundu biandi biotsu.

¹⁰ Aa Fumu, biagu biotsu biuguyitsa! Basigama bagu bogugabusila diboti.

¹¹ Bosamuna bundumba budurumu duagu; botubula mangolu magu.

¹² Bojabisa batu mangolu magu na bundumba budurumu duagu.

¹³ Durumu duagu duvu mutubu, musuga agu uitsingi te na mutubu. Fumu agekubuli pangini tsiandi, motsu ama evayingi melasi maboti mandi.

¹⁴ Fumu ewarisi botsu abeberuyi, Fumu ereliyi abamaberuga.

¹⁵ Botsu begugengili yisuisu na guibaveyi biguji va temu jiwelimina.

¹⁶ Guibaveyi biwelimina ubagukurusu na guidugusu nsala tsiogu tsiotsu.

¹⁷ Usigama uFumu uilabini na bisalu biandi biotsu na yingeba yiandi yidugunu mu mandi motsu.

¹⁸ Fumu avu bebeli na botsu abemunengili, nyiina, botsu abemunengili na murima uotsu.

¹⁹ Fumu edugusu nsala tsibasigama bandi, egulu migamu miogu na ebagobuli.

²⁰ Fumu ekelisi botsu abemurondi na ebungi batu babi botsu.

²¹ Nyusamuna duyitsu duFumu, batu botsu bagabusilingi Nsambi diboti te na mutubu.