Nyimbu 144 - La Sainte Bible en Langue Yipunu

DUIMBU Dusambu dukaga

¹ Duimbu duDavid. Diboti ombu Fumu aguvu dimanyi diami, oyindonsi utoga nesi dujabu dudivita.

² Avu muvayitsi ami umaboti na yivaga yiami na divumunu diami na Mugobutsi ami na ngubu ami na yisuemunu yiami. Esunsi malongu o tsi durumu duami.

³ Fumu, dibaala la nyi yiri gumurangiminanga? Muana mutu la nyi yiri gumubambanga?

⁴ Mutu uotsu avu nderi yiriri ayivembulu, bilumbu biandi bivioyi dedi mosi nana yidumbitsi.

⁵ Aa Fumu, diamisa julu agu, lesundugati; bemba mikongu te na nsumbili jipalingi.

⁶ Vedimisa tsiemu nopansa bavinitsi bami! Tinda mbansa tsiagu nobapansa!

⁷ Samba dikaka diagu guna julu, kwaki kalala nokobula mu mijamba mineni nesi mu miogu mibenyi.

⁸ Jogu bevosingi mfurulu na pa belevi pesi ufura befuri.

⁹ Aa Nsambi, nyuguwimbilila duimbu dugona, nyuguyitsanga na ngomfi ajivu na yigumi yimikudu:

¹⁰ Ndeʼ aguigobuli bakaga, agumagobula musalitsi agu David.

¹¹ Kwaki kala nokobula mu miogu mibenyi abevosingi mfurulu, ne pa belevi pesi ufura befuri!

¹² Baana betu bababaala babi nderi bivaru abisundili unega. Baana betu babagetu babi baboti nderi makutu amamabaku, amebuejisi ndagu kaga.

¹³ Bisuegulu bietu bibi bibasa na minongu miotsu mibiguji!

¹⁴ Biruitsi bietu bineni bifuningi tindi ufuna, vayaba abimafu kala va duburu! Mu makasa metu mayagulunu mitsundu!

¹⁵ Ka muna ubueji gu uvu na batu abelabi motsu mana! Ka muna ubueji gu uvu na batu aba Fumu avu Nsambi ogu!