Nyimbu 143 - La Sainte Bible en Langue Yipunu

DUIMBU Aa Fumu guyasiemba

¹ Duimbu duDavid. Aa Fumu, gulu dusambu duami, liga matuji ugulu ndembu tsiami! Kwaguli na usigama uagu na dusungugu duagu!

² Guyaretsiga musalitsi agu va gusu nsonsi; vagaa ne mutu mosi va butamba aguvu usungama va gusu agu.

³ Muvinitsi erondi umboka; amambeta kala; amabuaga o pisama dedi mosi na jogu abamafu kala.

⁴ Nyina murima utsira nyilabi tindi munyongu.

⁵ Nyirangimini temu tsikala na nyrangimini bisalu biotsu, nyikeluli bisalu biagu biotsu.

⁶ Nyigusambi makaka, nyina nsala agu dedi mosi nana butamba bugumuga buvu na nsala mamba. Letasatianu

⁷ Aa Fumu, kokolu tsiagu, kwaguliati! Murima ami umadeda. Guyandiyila nsima!

⁸ Nyubagunu na jogu abekoti o mbengi. Nyimaguvayila yitu. Kedi nyirangimini maboti magu; ndonsi nsila aji nyuvioyilanga, nyimagudibulila murima ami.

⁹ Aa Fumu kwaki kalala ombu bavinitsi bami?

¹⁰ Nyirondi udugusu duganu duagu mu mbari ndeʼ guvu Nsambi ami. Yinyunyi yiagu akwendisi mu nsila jisungama.

¹¹ Aa Fumu, guvu Fumu ka kobuli; na usigama uagu kusuli mu munyongu.

¹² Na durondu adu guitondi mbokili bavinitsi bami, na boka bakuanitsi bami botsu! Menu nyivu musalitsi agu.