Nyimbu 136 - La Sainte Bible en Langue Yipunu

DUIMBU Diboti ombu Mugobutsi uIsrael

¹ Yitsanu Fumu mu mbari avu muboti durondu duandi duitsingingi te na mutubu!

² Yitsanu Nsambi aguiviolili bansambi botsu durondu duandi duitsingingi te na mutubu!

³ Yitsanu Fumu aguiviolili bafumu botsu, durondu duandi duitsingingi te na mutubu!

⁴ Jandi pinsa evayingi bimaga bineni, durondu duandi duitsingingi te na mutubu!

⁵ Na dujabu duandi amasunda julu, durondu duandi duitsingingi te na mutubu!

⁶ Amasunda butamba va julu mamba, durondu duandi duitsingingi te na mutubu!

⁷ Amasunda bijalala bineni, durondu duandi duitsingingi te na mutubu!

⁸ Wisi uruma nyangu, durondu duandi duitsingingi te na mutubu!

⁹ Tsungi na bambuelili umma mukolu, durondu duandi duitsingingi te na mutubu!

¹⁰ Amabokisa tsomi tsibisi Egypte, durondu duandi duitsingingi te na mutubu!

¹¹ Amapalisa baIsrael va gari mamba, durondu duandi duitsingingi te na mutubu!

¹² Na mangolu mandi motsu, durondu duandi duitsingingi te na mutubu!

¹³ Amapasa Mubu uBenga, durondu duandi duitsingingi te na mutubu!

¹⁴ Amaviosa baIsrael va gari uonyi, durondu duandi duitsingingi te na mutubu!

¹⁵ Amagudisa Pharaon na bagora bandi o gari Mubu uBenga, durondu duandi duitsingingi te na mutubu!

¹⁶ Amawendisa batu bandi o kumu, durondu duandi duitsingingi te na mutubu!

¹⁷ Amabokisa bakaga baneni, durondu duandi duitsingingi te na mutubu!

¹⁸ Amabokisa bakaga abamaba na tindi mangolu, durondu duandi duitsingingi te na mutubu.

¹⁹ Sihon, kaga jibaAmor, durondu duandi duitsingingi te na mutubu!

²⁰ Na Og, kaga jiBachan, durondu duandi duitsingingi te na mutubu!

²¹ Amavega malongu motsu disiala ombu baIsrael, durondu duandi duitsingingi te na mutubu!

²² Disiala ombu baIsrael abavu basalitsi bandi, durondu duandi duitsingingi te na mutubu!

²³ Amaturangimina mu maguga metu, durondu duandi duitsingingi te na mutubu!

²⁴ Amatuwaka kalala ombu bavinitsi betu, durondu duandi duitsingingi te na mutubu!

²⁵ Eveyingi biguji ombu batu botsu, durondu duandi duitsingingi te na mutubu!

²⁶ Yitsanu Nsambi aguvu o julu durondu duandi duitsingingi te na mutubu!