Nyimbu 135 - La Sainte Bible en Langue Yipunu

DUIMBU Nyijabi Fumu avu muneni

¹ Yitsanu Fumu! Dodisanu Fumu, jenu basalitsi baFumu, mudodisianu,

² jenu aduvu o Ndagu Fumu nesi va ndombili tsiNdagu Nsambi etu!

³ Dodisanu Fumu mu mbari avu muboti, mudodisianu na nyimbu avu na yisagumunu.

⁴ Fumu amakesolila Jacob; amabonga baIsrael uba dikabu diandi.

⁵ Nyijabi yiri Fumu avu muneni; nyijabi yiri Fumu etu eviolili bansambi botsu.

⁶ Fumu evayi motsu ama erondi nesi o julu nesi va butamba nesi o mubu nesi o ndonga tsiotsu.

⁷ Ematisi mamungi o masuka mabutamba, evedimisi tsiemu na enoyisi mfula, epalisi punga mu bilundulu biandi.

⁸ La jandi agumabokisa tsomi tsiEgypte, ubanda na tsomi tsibatu te na tsibibulu.

⁹ O Egypte, amagulasa bilimba na bimaga uguwaka kalala ombu Pharaon na basalitsi bandi botsu.

¹⁰ Amabunga malongu na amboka bakaga abamaba na mangolu, miina mogu amama:

¹¹ Sihon kaga jibaAmor na Og kaga jiBachan na bakaga botsu baCanaan.

¹² Amavega dilongu diogu disiala ombu batu bandi baIsrael.

¹³ Aa Fumu, diina diagu diubanganga mutubu, diduma diagu diurangumunu te na kula tsiotsu.

¹⁴ Fumu otabulila batu bandi bunsonsi, jandi olasa abemuyitsi yingeba.

¹⁵ Bakosi babisi malongu bavu lora jivema na lora; bamasalu na batu.

¹⁶ Bana miunu tumba bagevosi via, bana misu tumba bagelabi,

¹⁷ bana matuji tumba bagegulu. Miunu miogu migepalisi punga!

¹⁸ Jogu abebavali bebagunu na bonyi dedi mosi na jogu abebavayili yitu.

¹⁹ Yifumba yiIsrael gabusilanu Fumu diboti! Jenu bavagulitsi bapagu bategula baAaron gabusilanu Fumu diboti!

²⁰ Jenu bambatsi baLevi gabusilanu Fumu diboti! Jenu basigama botsu, gabusilanu Fumu diboti!

²¹ Botsu abavu o Sion gabusilanu Fumu diboti! Aguitsani o mukongu uSion Yitsanu Fumu!