Nyimbu 132 - La Sainte Bible en Langue Yipunu

DUIMBU Sion, Mbura Nsambi na musiengi uDavid

¹ Duimbu dumulingitsi. Aa Fumu, rangimina David na maguga mandi motsu!

² Amalevila Fumu pesi ava amavariginina pangini na Nsambi Jacob rie:

³ Ngokota o ndagu ami ngonangama va tangi aji nyivumini,

⁴ ngowenda yilu notimba yilu,

⁵ te na nyudilila Fumu Mbura, Mbura aji Nsambi Jacob otsaninanga.

⁶ Tumagulu yiri yigara yipangini yivu o Efrata, tumayirasuna o nungi tsiYaar.

⁷ Tʼwendianu o Mbura Fumu, tuyegudamanu va yisunsulu yimakulu mandi.

⁸ Aa Fumu, kokolu tsiagu lerelamati, ruga o Mbura agu jiyivumu, bega yigara yiagu yipangini ayivu yitsiga yiagu!

⁹ Bavagulitsi bagu bapagu babi na dusungugu, na abagu basigama bagamuyi migamu minsangu!

¹⁰ Guyaliyila yibiatsi yiagu nsima mu diambu dimusalitsi agu David.

¹¹ Fumu amalevila David pesi, ajigabunsu rie: Muana agu nyusola oguvinga va yitsiga yiagu yibufumu.

¹² Pa ekelisi pangini ami nesi migaga miami ami nyimulonsi muana andi udibaala otsana va yitsiga yiagu yibufumu. Anana diubilanga.

¹³ Nyiina, Fumu amasola Sion, amaronda uyevaga Mbura andi.

¹⁴ Amavosa rie: Ajiji la Mbura ami jiuvumina; avava nyutsaninanga.

¹⁵ Nyuvayila Sion maboti, nyufunisa biguji biandi, nyugukurusu bijaga biandi.

¹⁶ Nyugabila bavagulitsi bapagu miula, basigama bandi bogamuganga migamu minsangu.

¹⁷ Avana nyufunisila David bategula, umosi obanganga kaga yibiatsi yiami yiuba nderi lambi ajigotsima.

¹⁸ Nyulasa bavinitsi bandi yisonyi tumba jaʼ beni oduara dugaba aduvedamanga.