Nyimbu 119 - La Sainte Bible en Langue YipunuDUIMBU Migaga miNsambi 1 Ka muna ubueji gu uvu na jogu abagaa na penda, abekipingi migaga miFumu! 2 Ka muna ubueji gu uvu na jogu abekelisingi maruma mandi, abemudedilingi na mirima miogu miotsu! 3 Abana bagevayingi mabi betsaningi nana Nsambi erondili. 4 Aa Nsambi, ndeʼ gumavega maruma magu yiri bomakelisanga na buranga. 5 Kokolu tsiagu kwamusi ujaba ukekelisa yiri nyukelisa migaga miagu! 6 Mbana ngolaba yisonyi ava nyumuegengilila maruma magu motsu. 7 Nyuguyitsa na murima ami uotsu, ava nyuwijilanga migaga miagu midusungugu. 8 Nyirondi ukelisa migaga miagu: guyandiyila nsima! 9 Tsie mufudu osungiyila bifu biandi? Yika pa egulungu diufi diagu. 10 Nyirondi ugudedila: guyansingisa ukakana na maruma magu! 11 Nyikelisi mambu magu mu murima ami yiri ngoguvayila dibi. 12 Aa Fumu, diboti ombu gagu. Ndonsi maruma magu. 13 Na munu ami nyitubuli motsu ama gumavosa. 14 Nyilabi nsangu uduka maruma magu nderi nyimadila bungunu buotsu. 15 Nyitasingi maruma magu na nyigengilingi mansila magu. 16 Nyilabi ubueji na malongu magu; ngelibini mambu magu. 17 Vayila menu musalitsi agu maboti yiri nyutsana sui nodedila malongi magu! 18 Tiemusi yiri nyulaba maboti mamigaga miagu! 19 Nyivu muenyi va butamba: guyansuega maruma magu. 20 Nyina nsala jineni ujabanga migaga miagu. 21 Guisiembi bango dunangu, jogu bamalogu na bamakakana na maruma magu. 22 Kusulili yisonyi na dilensa; nyikevega udedila maruma magu. 23 Barumitsi bamagukama na bamatungila fundu tumba menu musalitsi agu nyitasilingi yika migaga miagu. 24 Nyiina, migaga miagu mindasingi ubueji: mivu milonsi miami miboti. 25 Nyimabetsu, nyimasilama va tsi: tambusi nana gumavanginina! 26 Nyinotubula motsu ama nyimavaga gumakulu; ndonsi kanu tsiagu! 27 Njabisi migaga miagu, nyumitasanga va mosi na maboti magu! 28 Tindi munyongu nyilabi: tetsiyi nana gumavanginina! 29 Kakisini na bifu bibi bimfurlu na mu maboti magu ndonsi ujaba migaga miagu. 30 Nyimasola uba usigama uagu, nyudedilanga migaga miagu. 31 Nyikipingi maruma magu; Aa Fumu, guyandasa yisonyi! 32 Nyidedili migaga miagu na nsangu mu mbari guiroyisi dujabu duami. 33 Aa Fumu, ndonsi migaga miagu yiri nyumikelisanga te na mutubu. 34 Peyi diela ukelisa migaga miagu yiri nyumikelisanga na murima ami uotsu. 35 Ba mulonsi-nsila ami yiri nyujaba maruma magu nomarondanga, 36 yingusa murima ami uduka migaga miagu tsiri uduka busina. 37 Dibiga misu mami yiri ngokipa abigaa na tsongu, ndonsi nsanunu atsiugulasa ubueji! 38 Dugusulu menu musalitsi agu pangini agu aji gumavangana na basigama bagu. 39 Kusuli yisonyi ayipeyi murima o julu mu mbari maruma magu mavu maboti. 40 Nyina nsala jineni udukanga maruma magu; mu dusungugu duagu peyi monyu! 41 Aa Fumu, ndasi yingeba yiagu kobuli nana gumavanginina! 42 Mbana nyurungula uwagula jogu abemfuengilili mu mbari nyimakevega mu mambu magu. 43 Kwamusi uvosa ngensa temu tsiotsu tsongu ami jiruyili bunsonsi buagu. 44 Nyukelisanga migaga miagu temu tsiotsu te na mutubu. 45 Nyutsana na tindi dujegusu mu mbari nyiduki maruma magu. 46 Nyutubula maruma magu va gusu bakaga dionyi digondasa yisonyi. 47 Nyilabi ubueji na maruma magu na nyimarondi. 48 Nyusamba makaka mami uyitsa migagai miagu ami nyirondi, nyutasanga maruma magu. 49 Rangimina pangini agu aji gumavangana na musalitsi agu ajimapega ditasa. 50 Ava nyilabili maguga guimbembiyi, pangini agu jipeyi monyu. 51 Bango dunangu bendesingi, ne nana ngekakini na migaga miagu! 52 Aa Fumu, nyirangimini bunsonsi buagu abu gumatabula kala buonyi buimbembiyi. 53 Nyigaangungu na kabu jineni ava nyigengilili batu babi abeliyili migaga miagu nsima. 54 Maruma magu mavu dibandu dinyimbu tsiami nyumawimbila nesi o ndagu aji nyivu muenyi. 55 Aa Fumu, mukolu nyirangimini diina diagu! Va julu vana nyitasingi migaga miagu. 56 Nyilabi nsangu ukelisanga maruma magu. 57 Aa Fumu, nyimuevosingi rie: dikabu diami divu ukelisanga mambu magu. 58 Nyigulembiyili na murima ami uotsu rie: Ndasi yingeba nana gumavanginina. 59 Nyimatasa bifu biami nyirondi umueduka maruma magu. 60 Tsiri utsikadana nyisundili ededila maruma magu. 61 Mirambu mibatu babi minsieengili yiari na yiari; ne nana ngelibini migaga miagu. 62 Nyiretsimi va gari mukolu uguyitsa, mu diambu dibunsonsi buagu busungama. 63 Nyivu mbatsi jibotsu abegudumi na jogu abekelisi maruma magu. 64 Aa Fumu, bulongu buotsu bubasa na maboti magu; ndonsi duganu duagu! 65 Aa Fumu, nde guivayili menu musalitsi agu maboti nana gumavanginina. 66 Ndonsi diela na dujabu! Nyivayili maruma magu yitu. 67 Mbe nyisakalasu yisonyi mbe nyimatsiemuga, tumba namunyi nyikelisi mambu magu. 68 Ndeʼ guvu muboti na guivayingi maboti; ndonsi duganu duagu. 69 Bango dunangu bensokili mamfurulu, tumba menu nyikelisi maruma magu na murima ami uotsu. 70 Jogu bana matasa mabuduka; tumba menu nyilabi ubueji namigaga miagu. 71 Diwelimina yiri nyimalasu yisonyi, anana nyiwijili duganu duagu. 72 Ombu gami migaga miagu mivu miwelimina uviolila tosini tsibima bilora, nesi bilora jivema. 73 Ndeʼ beni gumansimda na dumambumba; peyi diela yiri nyuwiji maruma magu. 74 Ava basigama bagu bendabili belabi nsangu mu mbari nyivivi na nsangu adi guvosa. 75 Aa Fumu, nyijabi yiri bunsonsi buagu buvu busungama; na usigama uagu gumansingisa ulaba yisonyi. 76 Maboti magu mabi dubembugu duami dedi mosi nana gumavanginina na menu musalitsi agu. 77 Ndasi yiri guitondi mbana ngomuefu, nyina tindi nsala udedila migaga miagu. 78 Bango dunangu abendasingi maguga malalasa balasu yisonyi! Menu nyutasanga maruma magu. 79 Jogu abegudumi baruyi ombu gami, uyijaba migaga miagu! 80 Nyiyaba na mabeʼ mabeji mu maruma magu yiri ngolasu yisonyi! 81 Nyina nsala jineni na dugobutsu duagu na nyitasingi pangini agu. 82 Misu mami yika tsasa uviva pangini agu; nyiwivuli rie: Temu yi gumbembiyila? 83 Nyivu nderi mua mukata agumabuagu va yitala; ne nana ngelibini duganu duagu. 84 Bilumbu kweʼ bikivu nami, menu musalitsi agu? Temu yi gutabulila jogu abekuani bunsonsi? 85 Bango dunangu abeduki migaga miagu, utima betimi dubila duami. 86 Maruma magu motsu mavu sikiri; bekuaningi makuakuana: kwamusi! 87 Jogu bamabumbeta nombunga; menu ngeliyili maruma magu nsima. 88 Tambusi nana divu diwelimina na maboti magu yiri nyumuekelisa migaga miagu! 89 Aa Fumu, mambu magu mobanganga mutubuojulu. 90 Usigama uagu uilabiningi te na kula tsiotsu. Ndeʼ gumasunda butamba na buvu sikiri; 91 mu diambu dimigaga miagu biotsu bivu te na namunyi, mu mbari bima biotsu bivu o tsi durumu duagu. 92 Mbe migaga miagu migendasi ubueji mbe nyimafu kala mu maguga mami! 93 Viaga, ngolibana maruma magu, mu mbari monyi mepeyi monyu. 94 Menu nyivu mutu agu; kobuli! nyirorombi maruma magu. 95 Batu babi uviva bepivi umboka; nyivu nsumbumbu na nsala ukelisa migaga miagu. 96 Nyilabi mandilu magu magaa na mandilu. 97 Ka muna durondu du nyirondi migaga miagu! Bilumbu biotsu mivu dibandu dimatasa mami. 98 Maruma magu mepeyi tindi dujabu uviolila dubavinitsi bami, mu mbari mavu nami temu tsiotsu. 99 Nyina tindi diela uviolila milonsi miami mu mbari nyitasingi migaga miagu temu tsiotsu. 100 Nyina dujabu duneni uviolila binunu, mu mbari nyikelisi maruma magu. 101 Nyibusi tindi ubusa mabi motsu, mu mbari nyikipi ama gumavosa. 102 Ngekakini na migaga miagu mu mbari ndeʼ guimindonsi. 103 Mambu magu mavu tindi maboti ne uviolila buji! 104 Maruma magu mepeyi dujabu, la dibandu nyivinini mfurulu tsiotsu wandi. 105 Mambu magu mavu nderi lambi ukwendisa na nderi yijalala umbonitsa nsila. 106 Nyukelisa pangini aji nyimavangana nagu ukelisa migaga miagu misungama. 107 Nyilabingi tindi yisonyi; Aa Fumu, kwamusi nana divu diwelimina na mambu magu! 108 Aa Fumu, kokohi tsiagu gulu tsambu tsiami, na ndonsi migaga miagu. 109 Nyibufuangingi temu tsiotsu, ne nana ngelibini migagamiagu. 110 Batu babi betambili mirambu ne nana nyisakalibana maruma magu. 111 Migaga miagu mivu tindi diboti diami mutubu mu mbari mipeyingi nsangu. 112 Nyimavega murima ami udukanga duganu duagu mutubu te na dufu. 113 Nyivini bango mabeʼ mabeji, tumba nyirondi migaga miagu 114 Ndeʼ guvu yisuemunu yiami na ngubu ami; nyina ditasa dipangini agu. 115 Jenu batu babi kakananu nami, nyikelisingi maruma maNsambi ami! 116 Tangimini nana gumavanginina yiri nyudila monyu, guyasinga yiri ditasa diami diutsiemuga. 117 Ba muwarisitsi ami yiri ngoberuga; nyukipanga yika duganu duagu. 118 Ndeʼ guibusi botsu abekakini na duganu duagu mu mbari ndunsulu tsiogu tsigaa na tsongu. 119 Ndeʼ gugusula babi botsu va butamba nderi difuitsa, la dibandu nyirondili migaga miagu. 120 Nyireyimi na goma va gusu agu; nyidumi bunsonsi buagu. 121 Nyikelisi migaga na nyikipi dusungugu, guyansila ava bakuanitsi bami bendasili maguga! 122 Peyi pangini yiri gukelisa menu aguvu musalitsi agu, guyasingisa yiri bango dunangu bondasa maguga! 123 Misu mami yika tsasa, uviva nyivivi duwamusu duagu, nesi dugobutsu adu gumavangana. 124 Vayila menu musalitsi agu adivu diwelimina na maboti magu, na ndonsi duganu duagu. 125 Menu nyivu musalitsi agu, peyi dujabu yiri nyujaba migaga miagu. 126 Aa Fumu, temu agu usala jimatola; jogu besumuni migaga miagu. 127 Nyirondingi maruma magu uviolila lora tsimunongu na munongu. 128 Nyilabi yiri maruma magu motsu mavu mawelimina, nyivini mfurulu tsiotsu. 129 Migaga miagu mivu yika miboti na miboti, la dibandu nyikevega umikelisa. 130 Dutsigusu dumambu magu duiveyi yijalala, meveyi dujabu ombu mavolambpmbu. 131 Nyivu nsumbumbu mu mbari nyina nsala jineni ukelisa maruma magu. 132 Kengili nondasa yingeba dedi mosi nana guivayi jogu aberondi diina diagu. 133 Kwarisi mu mambu magu, guyasingisa ne dibi dimosi upiolila. 134 Kwaki kalala ava batu bendasili maguga yiri nyuyitsanga maruma magu. 135 Aa Fumu, ndasi yijalala yiagu, ndonsi duganu duagu. 136 Ulila nyililingi mu mbari batu bagekelisi migaga miagu. 137 Aa Fumu, ndeʼ guvu usungama, bunsonsi buagu buvu busungama wandi. 138 Migaga miagu milasi usungama na usigama uagu. 139 Murima ami uifutsingi mu mbari nyilabi bavinitsi bami belibini mambu magu. 140 Mambu magu magevinsi kingu, menu musalitsi agu nyimarondi. 141 Nyivu ngebi na nyilensungu; ne nana ngelibini maruma magu. 142 Dusungugu duagu duvu mutubu, migaga miagu mivu mingensa. 143 Maguga na munyongu bikaangingi, ne nana maruma magu mendasingi ubueji. 144 Migaga miagu mivu misungama te na mutubu; ndonsi umitsiyisa mbana nyudila monyu. 145 Nyigunengili na murima ami uotsu, Aa Fumu, kwaguli nyirondi ukelisanga maruma magu. 146 Nyigunengili rie: Kobuli nyirondi ukelisanga migaga miagu. 147 Ne wisi akatebuga nyigugengili, nyivivi adi guvosa. 148 Mukolu uotsu ngewendi yilu yika utasanga mambu magu. 149 Aa Fumu, ndasi yingeba na maboti magu! Kelisi nana divu diwelimhia na malongi magu. 150 Bakuanitpi abavu na dikasi ubambana bebambini, jogu bagejabi migaga miagu. 151 Fumu, ndeʼ guvu bebeli nami, maruma magu motsu mavu mangensa. 152 Kala kala migaga miagu mimanjabisa yiri gumamikunsa mutubu. 153 Gengila maguga mami nokwaka kalalaʼ Mu mbari ngelibini migaga miagu. 154 Kwaki kalala nonjeyisa, kobuli nana gumavanginina! 155 Batu abagekipi yitu nesi migaga bavu vala na dugobutsu duagu bagekipi duganu duagu. 156 Aa Fumu, durondu duagu duvu duneni kelisi nana divu diwelimina na bunsonsi buagu. 157 Bakuanitsi bami na bavinitsi bami bavu bapuela ne nana ngoliyila migaga miagu nsima. 158 Nyilabi mimbini nsoruru, jogu abagekipi malongi magu. 159 Fumu nyirondi maruma magu, kelisi nana divu diwelimina nagu. 160 Mambu magu motsu mavu yika ngensa na ngensa, migaga miagu miotsu midusungugu mivu na tsongu te na mutubu. 161 Bivunda bamakuananga, diuleba nyisamavaga diambu; ne nana nyireyimini yika mambu magu. 162 Nyilabi nsangu na mambu magu dedi mosi na jandi agumadila bungunu buneni. 163 Nyivini tindi uvina mfurulu, tumba nyirondi migaga miagu. 164 Nyiguyitsi yisambuali yikumbu yilumbu mu yilumbu mu diambu dimigaga miagu amivu misungama. 165 Jogu aberondi migaga miagu bana tindi duvotsu na bagoba na diambu adiubabetsa. 166 Aa Fumu, uviva nyivivi dujegusu duagu! nyikipingi maruma magu. 167 Nyikelisi migaga miagu na nyimirondi tindi uronda. 168 Nyiina nyikelisi maruma magu nesi migaga miagu mu mbari ndeʼ guilabingi motsu ama nyivayi. 169 Aa Fumu, migamu miami migulunu nagu! Peyi dujabu nana gumavanginina! 170 Dulembu duami dugulunu nagu! Kwaki kalala nana gumavanginina! 171 Gunomana undonsanga duganu duagu nyiguyitsingi temu tsiotsu. 172 Nyiwimbilingi nyimbu tsiagu! Maruma magu motsu mavu mawelimina. 173 Kwamusingi! nyimasola maruma magu. 174 Aa Fumu, nyivu nsumbumbu na nsala jidugobutsu duagu! Migaga miagu mindasi ubueji. 175 Aa Fumu, kelisa monyu ami yiri nyuguyitsanga! Bunonsi buagu bukwarisingi! 176 Nyivu yiari na yiari nderi yindombu ayimatsiemuga; ruga yitomba menu musalitsi agu, ngelibini maruma magu. |
La sainte Bible en langue Yipunu © Alliance Biblique du Cameroun, 1992.
Bible Society of Cameroon