Nyimbu 118 - La Sainte Bible en Langue Yipunu

DUIMBU Usamunanga maboti maFumu

¹ Yitsanu Fumu, avu muboti, durondu duandi duitsingingi te na mutubu!

² BaIsrael bavosi rie: Durondu duandi duitsingingi mutubu!

³ Bategula baAaron bavosi rie: Durondu duandi duitsingingi mutubu!

⁴ Jenu adubanogobulu vosanu rie: Durondu duandi duitsingingi mutubu!

⁵ Ava nyimalabilanga munyongu nyimasambila Fumu: Fumu amakulu na amanjeyisa.

⁶ Fumu avu aguami kabogu ngedumi diambu. Batu borungula upayila diambu?

⁷ Fumu avu muwamusi ami, nyilabi nsangu ava nyilabili dibetsulu dibavinitsi bami.

⁸ Uviolila ubueji uromba yisuemunu ombu Fumu tsiri ukevega ombu mutu.

⁹ Uviolila ubeji uromba yisuemunu ombu Fumu tsiri ukevega ombu baneni.

¹⁰ Bisi malongu bamakanda: na diina diFumu nyimababunga.

¹¹ Bamambambiga biari biotsu na diina diFumu nyimababunga.

¹² Bamakwitimina nderi banyosi, besundili utsiemuga dedi mosi nana kangi jitsimini; na diina diFumu nyimababunga.

¹³ Bamansindila umberusa; tumba Fumu amakwamusa.

¹⁴ Fumu avu mangolu mami, amakwaka kalala.

¹⁵ Migamu mindungulu na midugobutsu mimabasa mandagu mamatsanda de: mangolu maneni maFumu mamalabana!

¹⁶ Mangolu maneni maFumu mamatuvega ndungulu! Mangolu maneni maFumu mamalabana!

¹⁷ Ngofu via, tumba nyubanganga monyu, nyusamunanga maboti maFumu.

¹⁸ Fumu amakifisa, tumba asamansingisa dufu.

¹⁹ Ndibulilianu maguyi maNdagu Nsambi, nyikoti uyitsa Fumu.

²⁰ Munu ndagu Fumu agugu: avana basungama bekotilingi.

²¹ Fumu nyiguyitsi mu mbari gumakulu na gumakobula.

²² Dimanyi adimabuagu na barungitsi divu tindi adiviolila ubueji.

²³ Adudu la duganu duFumu na duonyi duitulasi ubueji!

²⁴ Ayiyi la yilumbu ayi Fumu amavaga: yionyi yibi dibandu dinsangu etu nobueji uetu wandi.

²⁵ Aa Fumu, tugobuli. Aa Fumu, tuveyi ndungulu!

²⁶ Miula mibi na jandi oyiruyi mu diina diFumu! Tuigabusili diboti ava tuvu o Ndagu andi.

²⁷ Fumu avu Nsambi, jandi etumonitsi. Tunganu yibulu yipagu yitondini na yibeyianu te no yinyensulu yipagu.

²⁸ Ndeʼ guvu Nsambi ami, nyuguyitsanga; Aa Nsambi ami, nyusamunanga buneni buagu.

²⁹ Yitsanu Fumu, avu muboti, durondu duandi duitsingingi mutubu.