Nyimbu 116 - La Sainte Bible en Langue Yipunu

DUIMBU Dusambu dumutu agu mbe ufu

¹ Nyirondi Fumumu mbari ekulu ava nyimusambilili.

² Amaliga matuji mandi ukulu; nyusambilanga yitsingu yiami yiotsu.

³ Dufu dumakaanga, goma ngila jimakaanga wandi; nyimalaba maguga na munyongu.

⁴ Tumba nyimatatila Fumu rie: Aa Fumu, kobuli!

⁵ Fumu avu na maboti na usigama, Nsambi etu avu na tindi durondu.

⁶ Fumu ekelisi mavolambombu; ava nyimakambululu amakobula.

⁷ Nyibi sui, mu mbari Fumu amapayila maboti.

⁸ Nyiina, Fumu gumakwaka kalala; ngomuefu, gumatsindula matsanga mami, gumakaanga; ngomueduku ne dibaku.

⁹ Nyumuewendanga va gusu Fumu va mosi na bisi butamba.

¹⁰ Nyimaba na yitu diuleba nyimavosanga rie: Nyilabi tindi maguga.

¹¹ Na munyongu ami nyimavosanga rie: Mutu uotsu avu mudunsitsi!

¹² Yi nyugabusila Fumu mu maboti motsu ama amapayila?

¹³ Nyuvagulila Fumu pagu jiunu; nyumunengilanga.

¹⁴ Nyudugusu pangini tsiami na Fumu va gusu batu bandi botsu.

¹⁵ Ka muna munyongu gu Fumu elabingi ava basigama bandi befuilingi.

¹⁶ Aa Fumu, kululuati! Menu nyivu musalitsi agu, dedi mosi na nguji ami. Ndeʼ gumanyangula mikudu miami.

¹⁷ Nyuguvagulila pagu tsikabusulu tsimaboti, nyutubula yiri ndeʼ guvu Fumu.

¹⁸ Nyudugusu pangini tsiami na Fumu, nyijidugusu va gusu batu bandi botsu,

¹⁹ va ndombili tsindagu andi na va gari ndeʼ Jerusalem. Yitsanu Fumu!