Nyimbu 112 - La Sainte Bible en Langue Yipunu

DUIMBU Ubueji ubasigama

¹ Yitsanu Fumu! Ka muna ubueji gu uvu na mutu oyidumi Fumu oyilabi ubueji na maruma mandi.

² Bategula bandi boba na mangoiu vava tsi, dukula dubatu basungama dugabulu miula.

³ Digumba na busina bivu o ndagu mutu usungama, dusungugu duandi duvu mutubu.

⁴ Yijalala yibangi o pisama umonitsa mutu usungama. Mutu usigama avu na tindi maboti na ana tindi yingeba.

⁵ Ka muna ubueji gu uvu na mungo maboti, jandi esombisi abamakambulu, esali bisalu biandi na dusungugu!

⁶ Jandi agepupi via; mutu usigama orangumunungu mutubu.

⁷ Agedumi misamu mibi; murima andi uvu sikiri, amakevega ombu Fumu.

⁸ Murima andi umawarusu; agelabi goma, ana murima usunda ulaba dibetsulu dibavinitsi bandi.

⁹ Egabingi biandi na abamakambulu; dusungugu duandi duvu mutubu. Oba na mangolu na batu bomuyitsa.

¹⁰ Ava mutu mubi emulabili esundili unyoga, evayingi duweriti na enyoyingi. Ditasa diandi dimatsiemuga.