Nyimbu 109 - La Sainte Bible en Langue Yipunu

DUIMBU Agumafuengululu uvonda evondi duwamusu duNsambi

¹ Duimbu duyivunda yibawimbitsi na duDavid. Aa Nsambi, nyiguyitsi, guyaba sui,

² Batu abagekipi yitu nesi migaga, beposili mambu mabi na mandunsulu, bemfurili.

³ Beposili mambu madivina, betumuni ne pa ngaavaga diambu.

⁴ Diuleba nyibarondi, bavu bavinitsi bami; tumba dusambu duvu yitogulu yiami.

⁵ Bekabusilingi dibi mu diboti, na bepiningi mu mbari nyibarondi.

⁶ Beposili rie: Miviosi o durumu dumutu mubi; v mufuengilitsi abi va mabaala mandi.

⁷ Bunsonsi buandi bubi mbela, dusambu duandi dumurombisi dibi!

⁸ Bilumbu biandi bigufusu, mutu susu avingi va mbura andi.

⁹ Baana bandi babi bisiana, mugatsi andi abi mukuili.

¹⁰ Baana bandi babi bilayilayi na bavonditsi, bayenarombanga biguji vala na mbura ogu ajimapansiga!

¹¹ Musuyiyitsi amupatuli biandi biotsu; benyi bamukindi abi edili mu yisalu yiandi.

¹² Ne mutu umosi ayamulasa yiri amaleba mbatsi andi; ne mutu umosi ayalasa bisiana biandi yingeba.

¹³ Bategula bandi baboku, yiri diina diandi diutsiemuga mu dukula aduba o gusu!

¹⁴ Mabi mabataji bandi mabi yirangumunu va gusu Fumu, disumu dunguji andi diyalibunu!

¹⁵ Mabi mogu mabingingi va gusu Fumu temu tsiotsu; bayamuerangumunu va butamba.

¹⁶ Mutu eni asamarangimina usalisa yingeba amakuana nobokisa agumakambulu nesi bijaga nesi agumaba na murima ubuliga!

¹⁷ Amarondanga ndogulu: tsimugaangi jaʼ beni! Asamaronda ugabila miula: mikakini nandi!

¹⁸ Ndogulu tsivu nderi yikutu yiandi na tsivu nderi mamba amamamutsatsu na tsivu nderi matsi mu bivisi biandi.

¹⁹ Tsimukubiyi nderi yiduaru ayi eduari, tsimupieti nderi beleeti aji eduaringi!

²⁰ Ayina yiuba yisaku ayi Fumu osaka bavinitsi bami nesi jogu abeposilingi posulu tsibi!

²¹ Aa Fumu, ndeʼ guvu Fumu ami! kwamusi mu diambu di-usigama uagu, kwaki kalala mu diambu dimaboti magu!

²² Nyimakambulu na yijaga nyivu, nyigulu murima ami yika buali.

²³ Uvioga nyivioyi nderi yidumbitsi ava wisi ewendili, nyimabingusu nderi dikokoku.

²⁴ Makotulu mami mamadeda mu diambu diubusa uji, nyimagasa tindi ugasa.

²⁵ Bavinitsi bami bendasingi yisonyi; bemuangisi miuru ava bekengilili.

²⁶ Aa Fumu Nsambi ami, kwamusi! kobuli mu diambu dimaboti magu!

²⁷ Bajabi mangolu magu, Aa Fumu bajabi yiri ndeʼ gumakwaka kalala!

²⁸ Jogu beloyi, ndeʼ guigabili miula; ava jogu boretsimina bolasu yisonyi diuleba menu musalitsi agu, nyulabanga nsangu.

²⁹ Bavinitsi bami balabingi yisonyi ayiubatsogumusu.

³⁰ Nyuyitsanga Fumu na diufi o julu, nyumusangilanga va gari yinombu.

³¹ Avu nsonsi ji-agumakambulu umuwaka kalala ombu jogu abemuveyi mbela.