Nyimbu 107 - La Sainte Bible en Langue Yipunu

DIBUKU DIMURANU DUIMBU Diboti ombu Nsambi aguvu Mugobutsi

¹ Diboti ombu Fumu mu mbari avu muboti Durondu duandi duitsingi mutubu!

² Adina, abagobulu baFumu bavosingi, aba amagabula ombu mutu mubi,

³ aba amagukiyila mu malongu motsu nesi o yiari ayi wisi epalili nesi ayi ewendisini nesi o banda nesi o tandu.

⁴ Bamosi bamayenalinganga yiari na yiari na basamadila musiengi utsanina.

⁵ Bamatsoganga na nsala na puila; bamadeda tindi udeda.

⁶ Ava bamalabilanga munyongu bamagamuyila Fumu, amabawaka kalala.

⁷ Amabasungiga mu nsila jisungama, yiri botola o musiengi aguvu na batu.

⁸ Bayitsingi Fumu na maboti mandi na bimaga abi amabavayila!

⁹ Amavotsa puila ji-agumajigulu, amagukurusu jandi agumagulu nsala.

¹⁰ Basusu bamatsananga o tsugu bamawarila maguga mabapanga o mbura tsipisama.

¹¹ Bamaba mimbini mimambu maNsambi bamalensa dilongi diNsambi Aguvu Uneni.

¹² Amabasundusa, amabasingisa ulaba maguga, bamaberuga, mutu asamabasika.

¹³ Ava bamalabilanga munyongu bamagumuyila Fumu, amabawaka kalala.

¹⁴ Amabapalisa o mbura tsipisama, na amabanyangula.

¹⁵ Bayitsingi Fumu na maboti mandi na bimaga abi amabavayila!

¹⁶ Amabula maguyi makunga na amapansa manguangu mamadilu.

¹⁷ Basusu bamanyongusu mu diambu dibifu biogu bibi na mu diambu dimabi mogu bamakambusu.

¹⁸ Bamavina minongu miotsu mibiguji, bamabufu.

¹⁹ Ava bamalabilanga munyongu bamagamuyila Fumu, amabawaka kalala.

²⁰ Amaruma na bamabeluga amabapalisa o yiduna.

²¹ Bayitsingi Fumu na maboti mandi na bimaga abi amabavayila!

²² Bavagulili Nsambi pagu tsikabusulu tsimaboti na basamuni bisalu biandi na migamu minsangu!

²³ Basusu bamawenda mu makumbi mogu uyesala yisalu yiogu o mubu.

²⁴ Muna bamalaba bisalu biFumu na bimaga biandi wandi.

²⁵ Na diambu dimosi amavotsa mungudi agumanangula mibiji mimubu.

²⁶ Makumbi mogu mamatsanduganga na mamadiamanga; bisi makumbi bamagaangu na goma jibidungu,

²⁷ bamagaangu na misu utsiengila; bamayenapepalananga nderi mutu aguvu na dilangi.

²⁸ Ava bamalabilanga munyongu, bamagamuyila Fumu, amabawaka kalala.

²⁹ Amavotsa mungudi na amagabusa duvotsu na mimbiji mimavola.

³⁰ Bamasangila mu mbari mimavola, Fumu amababega o disabu adi bamaronda.

³¹ Bayitsi Fumu na maboti mandi, na bimaga abi amabavayila!

³² Bamukakisi o yibenguna yiogu na bamuyitsi o yibenguna yibivimda!

³³ Fumu ekalusi mijamba kumu na ekamusi bileka.

³⁴ Ekalusi bulongu bunyega yika budukanga, mu diambu diubiva ubisi bulongu bueni.

³⁵ Ekalusi kumu yika dianga, biari bigumuga yika bileka.

³⁶ Amatsanisa jogu abavu na dungosu dunsala muna. Bamarungisa musiengi utsaninanga.

³⁷ Bamavarisa manungi nesi mfuga atsiburi rayisan na bamadila digumba.

³⁸ Fumu amabagabila miula na bamafuna tindi ufuna, asamagaru yiri biruitsi biogu biufuanganga.

³⁹ Bamosi va gari ogu bamafu basusu bamalasungu maguga mamunongu na munongu.

⁴⁰ Fumu amalasa baneni yisonyi na amabalinsa o yiari ayigaa na nsila.

⁴¹ Tumba amawaka abamakambulu kalala na amafunisa mikuta miogu nderi migamba mibiruitsi.

⁴² Batu basungama basangili mu motsu mana; batu babi badibiyi makaka mu miunu.

⁴³ Jandi aguvu na dujabu akebini na mambu meni, ajabi yiri Fumu avu muboti.