Nyimbu 106 - La Sainte Bible en Langue Yipunu

DUIMBU Bumbini bubaIsrael, usigama uNsambi

¹ Yitsanu Fumu! Yitsanu Fumu mu mbari avu muboti, durondu duandi duitsingingi mutubu!

² Anyi orungula utala bisalu bineni biFumu? Anyi osamuna duyitsu duandi duotsu?

³ Ka muna ubueji gu uvu na jogu abekelisi migaga miNsambi abekipingi dusungugu temu tsiotsu!

⁴ Aa Fumu turangimini na maboti magu ama guivayilingi batu bagu! Turangimini ava guiwamusili batu bagu.

⁵ Yiri tulaba ubueji ubisolu biagu na tulaba nsangu va mosi na batu bagu nosangila disiala diagu va mosi nogu!

⁶ Tumavaga masumu dedi mosi na batu betu, mabi metu mamafunanga, tuna mbela.

⁷ Bataji betu o Egypte bamakipa bimaga biagu, basamarangimina maboti magu mapuela mapuela, bamaba mimbini ava bamabila va mugula Mubu uBenga.

⁸ Tumba amabagobula mu diambu didiina diandi, amabalasa mangolu mandi.

⁹ Amasiemba Mubu uBenga na umakamuga; amabaviosa mbura tsigumuga kuasa.

¹⁰ Amabagobula ombu jandi agumabavinanga; amabawaka kalala ombu muvinitsi.

¹¹ Mamba mamadiamisa bavinitsi bogu; basamasiala ne umosi.

¹² Bamavayila mambu maNsambi yitu, bamawimbila nyimbu umuyitsa.

¹³ Mua pesu temu bamalibana bisalu biandi, basamavivaugulu malongu mandi.

¹⁴ Ava bamabila a kumu bamadunsu na dunyungi, avana bamamangila Nsambi.

¹⁵ Amabasingisa nyama atsi bamavonda mbana amabatindila dubungu dunyuru tsiogu.

¹⁶ Ava bamatsanina va mulaku bamawava Moise na Aaron agumaba musalitsi uFumu.

¹⁷ Butamba bumadibuga na bumatsudiga Datan na Abiram na batu bandi wandi.

¹⁸ Muji umasielasana yinombu yiogu milutsu mimuji mimasielasana yindombu yieni.

¹⁹ Bamavaga muana ngombi o Horeb, bamagudama va gusu uonyi.

²⁰ Bamavinsa bundumba buNsambi na yibagunu yingombi ajijangingi biriri.

²¹ Bamalibana Nsambi Mugobutsi ogu, agumavaga mambu maneni o Egypte,

²² amavaga bimaga bineni o bulongu buCham na bilimba mu Mubu uBenga.

²³ Kabogu Nsambi amavosa yiri obabunga; tumba Moise agumaba yisolu yiandi amaretsama va gusu Nsambi ugubitsa kabu andi, kabogu asamamuebabunga.

²⁴ Bamalensa bulongu bumaboti; basamavayila mambu maFumu yitu.

²⁵ Bamangungarananga o mandagu mogu mamatsanda, basamadedila diufi diandi.

²⁶ Mbana amabaganina kaka yiri obabokisa o kumu,

²⁷ noyenapansanga bategula bogu yiari na yiari, ubokusu o malongu mangana.

²⁸ Bamakevega o Peor, o muyitsa uBaal; bamaji bibulu abimavagululu bamfumbi.

²⁹ Bamanyoyisa Fumu na bifu biogu, yivunga yimalabana va gari ogu.

³⁰ Pinhas amaretsama uvosa diambu, mbana yivunga yimavioga.

³¹ Fumu amamuvega ndunga te na kula tsiotsu.

³² Bamanyoyisa Fumu va mugula mamba maMeriba. Moise amakilusu mu diambu diogu:

³³ Bamamunyongisa te na amavosa posulu tsibuduka.

³⁴ Basamabunga bisi Canaan aba Fumu amabaruma ubunga.

³⁵ Tumba bamafubana na bisi malongu masusu, bamawiji uvaga dedi mosi nogu,

³⁶ bamasalila bakosi bogu, tsionyi tsimaba murambu ombu gogu.

³⁷ Bamavagula baana bogu bababaala nesi babagetu pagu.

³⁸ Bamawitila malungu ma-abagaa na mbela diwendi rie: mabaana bogu aba bamavagulila bakosi baCanaan, bulongu bumasabulu na bukongu.

³⁹ Bamakevaga nsoruru na bifu biogu, bamabiva tindi ubiva.

⁴⁰ Fumu amanyoyila batu bandi kabu, amalaba disiala diandi nsoruru.

⁴¹ Amabawakisa ombu bisi malongu; jogu abamabavinanga bamabarumanga.

⁴² Bavinitsi bogu bamabakambisa, bamasundusu o tsi durumu duogu.

⁴³ Fumu amabawaka kalala kumbu tsipuela tumba bamakelasa mimbini na kanda tsiogu, mabi mogu mamabarombisa utsiemuga.

⁴⁴ Fumu amagululu ndembu tsiogu, ava amalabila munyongu ogu.

⁴⁵ Amarangimina pangini andi nogu; mu diambu dimaboti mandi maneni,

⁴⁶ amarombisa jogu abamabakelisa o tsugu ubalasa yingeba.

⁴⁷ Nsambi Mugobutsi etu, tugobuli, tuwaki kalala va gari malongu, tugukiyi kabogu tuguyitsanga, tuyitsanga diina diagu diyingitsi, tulasanga bundumba buagu uguyitsa.

⁴⁸ Diboti ombu Fumu Nsambi Israel. Diboti ombu gandi mutubu na mutubu. Batu botsu bagamuyi rie: Yitsanu Fumu!