Nyimbu 105 - La Sainte Bible en Langue Yipunu

DUIMBU Yilombi yi-usigama uNsambi

¹ Yitsanu Fumu, munengilianu na diina diandi! Jabisanu bisalu biandi bineni ombu batu!

² Wimbilanu, wimbilanu umuyitsa! Vosanu mu diambu dimaboti mandi motsu!

³ Mukakisianu, Nsambi aguvu tindi Nsambi! Aberondi Fumu basangilingi!

⁴ Rombanganu Fumu na mangolu mandi, murombinganu temu tsiotsu.

⁵ Rangiminanganu bilimba abi amalasanga na bimaga biandi na bunsonsi buandi

⁶ jenu baIsrael basalitsi bandi, jenu baJacob bisolu biandi.

⁷ Nsambi avu Fumu etu, erumi malongu motsu.

⁸ Rangiminanganu pangini andi te na mutubu, pangini tsiandi tsitsingi te na tosini tsikula.

⁹ Pangini aji amavangana na Abraham na pesi andi aji amalevila Isaac;

¹⁰ ombu Jacob pangini jimakaluga mugaga, ombu baIsrael pangini jimutubu,

¹¹ ava amavosila rie: Nyuguvega bulongu buCanaan adina divu dikabu diagu didisiala.

¹² Dumaleba yika mua dikabu dibatu tindi mua pesu dumaba benyi mu bulongu bungana.

¹³ Bamawendanga yiari na yiari, o bufumu bumosi te no bususu.

¹⁴ Tumba Nsambi asamavega mutu musuga ubalasa maguga, mu diambu diogu amakilisa nesi bakaga.

¹⁵ Amavosa rie: duyabemba bibiatsi biami, duyavaga babiyitsi bami dibi!

¹⁶ Fumu amabatindila dungosu dunsala; amagusula biguji biotsu.

¹⁷ Amabaretsila dibaala o gusu ogu: Joseph agumasumbusu muviga.

¹⁸ Bamamutunga makulu na bapanga, bamamugomina mu bivanga,

¹⁹ tenatemu aji diambu adi Fumu amavosa dimalabana, adimalasa ndunga jiJoseph.

²⁰ Kaga amaruma batu umujeyisa, murumitsi eni amamuwaka kalala.

²¹ Amamuvaga Fumu jindagu andi na murumitsi ubima biandi biotsu,

²² na musuga uotsu uruma basefu bandi nolonsa bivunda biandi dujabu.

²³ Mbana Israel amawenda o Egypte, Jacob amatsana o bulongu buCham.

²⁴ Batu baFumu bamafuna tindi ufuna, bamaba na mangolu uviolila bavinitsi bogu.

²⁵ Amavinsa matasa mabisi Egypte te na bamavina batu bandi, bamadunsa basigama bandi.

²⁶ Amatinda musalitsi andi Moise na Aaron agumasolu mandi.

²⁷ Na mangolu maNsambi bamavaga bimaga va misu mabisi Egypte na bamavaga bilimba o bulongu buCham.

²⁸ Amatinda pisama ajimaba jipinda fio, yiri bodunda uba mimbini mimambu mandi.

²⁹ Amakalusa mamba malungu amamabokisa nyama tsiogu tsimamba.

³⁰ Bulongu bumabasa na milansa te no mandagu mabakaga.

³¹ Nsambi amaruma: biragala bimabasa bulongu bifuru bimabasa bulongu buotsu.

³² Amabanoyisila mfula jimamanyi, na milutsu mimuji o bulongu buotsu;

³³ amabunga mfuga tsiogu tsirayisan na mifiga wandi na amarakula miri miyiari yiogu.

³⁴ Nsambi amamueruma: na makokoku mamalabana makokoku mapuela mapuela,

³⁵ mamajanganga biriri biotsu bibulongu, mamajanganga milunda miotsu mu manungi mogu.

³⁶ Amabokisa tsomi tsiotsu tsibisi Egypte, baana batega bamangolu mogu.

³⁷ Amapalisa batu bandi ubasa de na lora jivema na lora. Ne mutu mosi mu bifumba biandi asamasietuga.

³⁸ Bisi Egypte bamagaangu na dunsiensi kabogu ava baIsrael bamawendila, bamasangila.

³⁹ Nsambi amabakubiga o tsi dimungi, mukolu muji umabamonitsa.

⁴⁰ Banovonda biguji Fumu amabatindila banguali, amabagukurusu biguji abimabonduyila o julu.

⁴¹ Amadibula dimanyi na mamba mamapala; mamabasa kumu nderi mujamba.

⁴² Amarangimina pangini andi aji amavangana na musalitsi andi Abraham.

⁴³ Amapalisa batu bandi na nsangu na bisolu biandi na migamu mindungulu.

⁴⁴ Amabavega malongu, bamadila bisalu abi batu basusu bamasala,

⁴⁵ biotsu bina yika pa bokelisanga maruma mandi na migaga miandi. Yitsanu Fumu!